*

Bílar 19. febrúar 2020

Defender stekkur 30 metra í Bond mynd

Í nýju kvikmyndinni um njósnara hennar hátignar, James Bond: No Time To Die, heldur áratugasamstarf við Land Rover áfram.

Nýr Land Rover Defender fær það óþvegið í nýjustu kvikmyndinni um James Bond, No Time To Die, því í hverri tökunni á fætur annarri fljúga jepparnir í loftköstum í æsilegum eltingarleikjum. Þar á meðal er eitt 30 metra stökk og heilhringur.

Bílarnir sem notaðir voru eru fyrstu bílarnir sem komu af færibandinu og þeim var ekki breytt sérstaklega fyrir tökurnar. Alls notuðu framleiðendur myndarinnar tíu nýja Defender, þar á meðal þann sem var númer 007 á framleiðslulínunni.

Frá því að Land Rover forkynnti bílinn í september sl., hefur fyrirtækið notið fordæmalauss áhuga almennings á nýja bílnum og hlaðast pantanir viðskiptavina upp hjá flestöllum umboðsaðilum sem byrja afhendingar á fyrstu bílunum á vormánuðum eða um svipað leyti og kvikmyndin No Time To Die fer í sýningar. Von er á fyrstu bílunum til BL í vor.

Myndirnar og vefslóð á myndband sem fylgja fréttinni voru teknar við auglýsingagerð Land Rover í Skotlandi þar sem myndatökur No Time To Die fóru m.a. líka fram, og var bílunum í engu hlíft við akstur á hámarkshraða um mýrar og móa og yfir ár. Meðal annars valt einn Defender bílanna heilhring og var ekið viðstöðulaust áfram eftir að hann lenti aftur á hjólunum.

Áhættuatriðunum í tökunum stjórnaði Lee Morrison ásamt Chris Corbould sem hlotið hefur Óskarsverðlaun fyrir kvikmyndatæknibrellur.

„Við ýttum Defender meðvitað á ystu mögulegu nafir til að skapa hámarksspennu og til að gefa aðdáendum innsýn í þær gríðarlegu áskoranir sem bílaatriðin og kvikmyndatökurnar voru þannig að áhorfendurnir geti hlakkað virkilega til þess að sjá kvikmyndina sem frumsýnd verður í apríl,“ sagði Morrison að tökunum loknum.

Áratuga samstarf

Nick Collins, framleiðslustjóri Defender hjá Land Rover, segir að nýr prófunarstaðall hafi verið þróaður fyrir nýjan Defender, sá erfiðasti sem Land Rover hafi þróað til þessa og sé einstakur fyrir Defender.

„Styrkur bílsins í heild og ending er mæld með mörgum mismunandi og ólíkum prófunum. Sum prófanna fólust í því að láta bílinn fara brúarstökk sem fullvissuðu okkur um að Defender myndi standast þær gríðarlegu raunir sem framleiðendur kvikmyndarinnar hugðust láta bílana þreyta í áhættuatriðunum án þess að þeir yrðu styrktir neitt sérstaklega fyrir utan að þeir voru búnir veltigrind,“ sagði Collins.

Land Rover hefur átt samstarf við framleiðendur kvikmyndanna um James Bond í 37 ár eða frá 1983 þegar Range Rover Convertible var notaður við gerð myndarinnar Octopussy. Í nýjustu myndinni eru notaðir tíu Land Rover Defender bílar, einn Range Rover Sport SVR, Land Rover Series III og Range Rover Classic.

Stikkorð: James Bond  • Land Rover  • Defender  • No Time To Die