*

Menning & listir 25. september 2012

Djúpið framlag Íslands til Óskarsverðlaunanna

Djúpið fékk meirihluta atkvæða íslensku akademíunnar. Tvær íslenskar kvikmyndir hafa hlotið tilnefningu til Óskarsverðlaunanna

Meðlimir Íslensku kvikmynda- og sjónvarpsakademíunnar völdu kvikmyndina Djúpið sem framlag Íslands til Óskarsverðlaunanna á næsta ári. Djúpið mun því keppa fyrir Íslands hönd um Óskarsverðlaunin fyrir bestu kvikmyndina á erlendu tungumáli.

Þetta kemur fram í tilkynningu akademíunni (Eddunni). Þar kemur fram að Djúpið hlaut meirihluta atkvæða akademíumeðlima en kosningu lauk á miðnætti í gær. Kosningin fór fram rafrænt og kosið var á milli þeirra fimm íslensku kvikmynda sem uppfylltu það skilyrði bandarísku kvikmyndaakademíunnar að hafa verið frumsýndar á tímabilinu 1. október 2011 til 30. september 2012.

Djúpið byggir á samnefndu leikriti Jóns Atla Jónassonar og fjallar um þrekvirki Guðlaugs Friðþjófssonar, eina eftirlifandi skipverjans á Helliseynni sem sökk skammt frá Vestmannaeyjum árið 1984.

Tvær íslenskar kvikmyndir hafa hlotið tilnefningu til Óskarsverðlaunanna. Börn náttúrunnar eftir Friðrik Þór Friðriksson var tilnefnd árið 1992 í flokknum besta erlenda kvikmyndin og árið 2006 var Síðasti bærinn eftir Rúnar Rúnarsson tilnefnd í flokknum besta leikna stuttmyndin.