*

Bílar 19. apríl 2019

Dýrasti bíll heims

Bugatti frumsýndi á dögunum dýrasta bíl heims La Voiture Noire sem útleggst svarti bíllinn á okkar ylhýra.

Bugatti frumsýndi á dögunum dýrasta bíl heims La Voiture Noire sem útleggst svarti bíllinn á okkar ylhýra. Þessi magnaða sportkerra fæst að sjálfsögðu einungis svört að lit. 

Sportbíllinn var frumsýndur á bílasýningunni í Genf þar sem margt var um nýja ofursportbíla en þessi vakti að sjálfsögðu verðskuldaða athygli. Þetta er tveggja sæta lúxus sportbíll með 8 lítra W16 ofurvél undir húddinu. Stephan Winkelmann, forstjóri Bugatti, segir að vélin sé tæknilegt meistaraverk og sú fullkomnasta í heimi. Vélin er gríðarlega öflug og skilar bílnum 1.480 hestöflum. Bíllinn mun toga 1.180 Nm. Bugatti gefur ekki upp á þessari stundu hversu hratt bíllinn fer úr kyrrstöðu í hundraðið.

La Voiture Noire er með undirvagn frá hinum öfluga Bugatti Chiron. Hönnun La Voiture Noir er undir áhrifum hins goðsagnakennda Bugatti Type 57 SC Atlantic en aðeins fjórir slíkir bílar voru smíðaðir á árunum 1936-1938.
Stefnt er að því að La Voiture Noire komu á markað eftir tvö ár. Verðmiðinn er litlir 2,3 milljarðar króna sem gerir hann að dýrasta bíl heims. Það er ljóst að það verður ekki á allra færi að eignast þennan magnaða svarta sportbíl.

Stikkorð: Bugatti