*

Bílar 7. september 2020

Einn tæknivæddasti bíll heims

Nýr Mercedes-Benz S-Class lúxusbíll getur ekið á sjálfstýringu að miklu leiti. Er með 250 km hámarkshraða á klukkustund.

Róbert Róbertsson

Mercedes-Benz frumsýndi á dögunum nýja kynslóð af S-Class lúxusbílnum sem er án efa tæknivæddasti fjöldaframleiddi bíll heims. Hann er búinn ótrúlegum tæknibúnaði og getur ekið á sjálfstýringu að allmiklu leyti.

S-Class er flaggskip fólksbílaflota Mercedes-Benz og mest seldi lúxusbíll heims síðan hann kom fyrst á markað árið 1972. Nýr S-Class er búinn Drive Pilot kerfinu sem getur ekið að miklu leyti á sjálfstýringu. Kerfið er með háþróuðum nemum allt í kringum bílinn en einnig 360 gráðu myndavél.

Bíllinn skiptir sjálfur um akrein

Þessi sjálfstýringarbúnaður gefur bílnum færi á að skipta um akrein sjálfur ef ökumaður gefur eingunis stefnuljós. Ökumaður getur gripið inn í hvenær sem er og tekið yfir aksturinn. Þá getur bíllinn nauðhemlað sjálfur ef hætta steðjar að á veginum fyrir framan hann hvort sem um er að ræða ökutæki eða gangandi vegfarendur.

S-Class mun einnig koma í tengiltvinnútfærslu undir EQ Power merki Mercedes-Benz en drægi bílsins mun vera allt að 100 km skv. WLTP staðli. Nýr S-Class er enn stærri og rúmbetri en forverinn og sem dæmi má nefna að farangursrýmið hefur stækkað um 20 lítra í alls 550 lítra.

S-Class er fjórhjóladrifinn og kemur með aflmiklum bensín- og dísilvélum. S 500 með bensínvél skilar 435 hestöflum og 520 Nm í togi. Bensínbíllinn fer úr kyrrstöðu í hundraðið á aðeins 4,9 sekúndum sem er gríðarlega gott fyrir svo stóran lúxusbíl.

Dísilvélarnar skila annars vegar 282 og hins vegar 325 hestöflum og fara úr kyrrstöðu í hundraðið á 5,4 og 6,4 sekúndum. Eyðslan er frá 7,8 lítrum á hundraðið í bensínbílnum miðað við blandaðan akstur en frá 6,2 lítrum á hundraðið í dísilbílnum. Hámarkshraði S-Class er 250 km/klst.

Hægt að velja 10 mismunandi nuddkerfi

Lúxusinn er allsráðandi í innanrýminu þar sem mikið er lagt upp úr fyrsta flokks þægindum og vönduðu efnisvali. Sætin eru sérlega þægileg úr þykku leðri og fara vel með ökumann og farþega. Hægt er að velja um 10 mismunandi nuddkerfi í sætunum. Tæknin í nýjum S-Class er raunar í algerum sérflokki.

S-Class verður í boði með fimm stórum skjám með OLED tækni og eru þeir mjög áberandi í glæsilegu innanrýminu og bjóða m.a. upp á 3D spilun. Bíllinn er í boði með mögnuðu Burmester®  4D hljómkerfi og hátalararnir í bílnum eru alls 31 talsins. Bíllinn er með annarri kynslóð MBUX margmiðlunarkerfinu sem veitir ökumanni og farþegum nýjan heim upplýsinga og afþreyingar. Aðgengileg og þægileg stjórnun með raddskipunum, snertingu eða bendingum. MBUX lærir og lagar sig sífellt betur að þörfum ökumannsins.

Of langt mál væri að telja upp allan hátæknibúnaðinn í akstursaðstoðar- og öryggiskerfum S-Class en nefna má hið háþróaða Intelligent Parking Pilot kerfið sem aðstoðar ökumann að leggja í stæði og hið háþróaða E Active Body Control sem er án efa eitt tæknivæddasta demparakerfi sem framleitt hefur verið í bifreið og veitir mikil þægindi í akstrinum.

Stikkorð: Mercedes-Benz  • S-Class  • lúxusbíll