*

Tölvur & tækni 2. október 2017

,,Erum stolt af þessari tilnefningu"

Orka náttúrunnar er tilnefnd til alþjóðlegu CHARGE vörumerkjaverðlaunanna sem besta vörumerkið í flokki grænnar orku.

Kolbrún P. Helgadóttir

ON er eina íslenska fyrirtækið sem tilnefnt er í flokknum og keppir þar við fjögur erlend vörumerki. Besta vörumerkið að mati fjölmennrar alþjóðlegrar dómnefndar verður útnefnt 10. október næstkomandi.

,,Við erum stolt af þessari tilnefningu. Þarna eru margir kallaðir en fáir útvaldir og það er frábært að fá hvatningu af þessu tagi í þeim mikilvægu verkefnum sem ON vinnur að. Við höfum hvatt eindregið til rafbílavæðingar hér á landi – bæði í orði og í verki – og vörumerki ON er orðið óaðskiljanlegt þeirri þróun. Rafbílabyltingin getur orðið eftirmynd hitaveitubyltingarinnar sem var góð fyrir umhverfið, góð fyrir veskið og góð fyrir orkusjálfstæði þjóðarinnar. Fyrir það vill ON standa og tilnefningin gefur til kynna að við séum á réttri braut," segir Áslaug Thelma Einarsdóttir, forstöðumaður einstaklingsmarkaðar ON.

Áslaug Thelma segir að samkeppni á raforkumarkaði fari vaxandi og vörumerkjaþróun eða „branding“ skipti sífellt meira máli fyrir velgengni orkufyrirtækja. Til marks um það sé vaxandi aðsókn að alþjóðlegu CHARGE ráðstefnunni sem haldin verður 9.-10. október í Hörpu en í tengslum við hana verða CHARGE verðlaunin veitt.

Orka náttúrunnar tók til starfa í ársbyrjun 2014 eftir lögbundna aðgreiningu sérleyfis- og samkeppnisþátta í rekstri Orkuveitu Reykjavíkur. Vörumerkið er því ungt. ON rekur þrjár virkjanir, selur rafmagn til um helmings landsmanna og aflar um helmings heita vatnsins í hitaveituna á höfuðborgarsvæðinu.

Einna mesta athygli hefur Orka náttúrunnar vakið fyrir forystu fyrirtækisins í uppbyggingu innviða fyrir rafbíla. Allt frá vorinu 2014 hefur ON kappkostað að gera rafbílaeigendum lífið léttara með hraðhleðslum víða um land og ON hefur einsett sér að varða hringveginn hlöðum í samstarfi við ýmsa aðila. Hlöðurnar eru orðnar 17 talsins og verða væntanlega orðnar fleiri en 20 fyrir árslok.