*

Bílar 24. ágúst 2015

Eyesight vann í Automotive Brand Contest

Öryggiskerfið Eyesight í Subaru hlaut fyrstu verðlaun í flokknum samhæfð tengsl í Automotive Brand Contest.

Öryggiskerfið Eyesight í Subaru hlaut fyrstu verðlaun í flokknum „Connectivity“ í alþjóðlegu samkeppninni Automotive Brand Contest í Þýskalandi sem lauk í liðinni viku. Verðlaunin verða afhent á alþjóðlegu bílasýningunni í Frankfurt 15. september næstkomandi.

EyeSight er talið eitt fullkomnasta öryggiskerfi sem völ er á í dag og aðstoðar ökumenn við að koma í veg fyrir árekstra. Subaru hefur unnið að þróun kerfisins síðastliðin 20 ár og hafði verið í prófunum í almennri umferð í Japan í fimm ár áður en það var sett á alþjóðamarkað sl. vor.

Automotive Brand Contest er hlutlaus alþjóðleg samkeppni þar sem bílaframleiðendur keppa í hönnun og nýjungum. Í úrslitum eru síðan framúrskarandi vörur heiðraðar og hefur samkeppnin öðlast mikla virðingu í alþjóðlegu bílgreininni, þar sem vakin er athygli á nýjungum sem brjóta blað að mati dómnefndar.

Í þessu tilviki mætti ef til vill útleggja Connectivity sem „samhæfð tengsl“ á íslensku þar sem öryggiskerfið tengir saman tvær myndavélar sem staðsettar eru innan við framrúðuna og senda litmyndir í þrívídd til tölvu sem kennt hefur verið að bera kennsl á lögun hluta og greina hraða og fjarlægðir með næstum sömu nákvæmni og mannsaugað býr yfir. EyeSight gerir einnig greinarmun á gangandi vegfarendum, reiðhjólum, mótorhjólum og bílum auk þess að skynja hemlaljós svo eitthvað sé nefnt.

Stikkorð: Bílar