*

Bílar 8. ágúst 2014

Fjölhæfur V-Class

Hönnun á nýjum Mercedes Benz V-Class þykir mjög vel heppnuð.

Nýr Mercedes Benz V-Class er nýkominn í Bílaumboðið Öskju en um er að ræða einstaklega fjölhæfan bíl úr smiðju þýska lúxusbílaframleiðandans. V-Class getur verið 6, 7 eða 8 sæta, allt eftir þörfum. Hann er einstaklega fjölhæfur í uppsetningu og breytileg sætauppröðunin gefur skemmtilega möguleika. 

Fjögur, þægileg og sjálfstæð sæti eru staðalbúnaður í afturrýminu. Þau eru einstaklega þægileg og opna fyrir breytilega notkun á farþegarýminu. Með þriggja sæta bekkum fyrir aðra og þriðju sætaröð má fjölga farþegum í afturrými upp í fimm eða sex. Brautakerfi fyrir sæti með hraðlosunarbúnaði fylgir bílnum. Ef þörf er á sérstaklega miklu flutningsrými er hægt að fjarlægja sæti úr farþegarýminu á einfaldan hátt.

Hönnunin á þessum nýja bíl frá lúxusbílaframleiðandanum í Stuttgart þykir vel heppnuð. Grill með tveimur rimum og hátæknivædd LED aðalljós gefa V-línunni svipríkt yfirbragð. Innanrými V-Class er ekki síður sannfærandi með hágæða frágangi og efnisvali.

V-Class er boðinn með þremur útgáfum af 2,2 lítra díslivél sem afkastar 100, 120 eða 140 kW og stuðlar að afar góðum aksturseiginleikum, lágri eldsneytisnotkun og akstursþægindum eins og í fólksbíl.  Bíllinn er fáanlegur með þremur mismunandi gerðum fjöðrunarkerfa með allt frá þægilega afslappandi eiginleikum til sportlegra eiginleika.