*

Bílar 9. júní 2021

Ford Mustang Mach-E lentur á Íslandi

Hingað til hefur Ford Mustang aðeins fengist sem tveggja dyra sportbíll en fæst nú sem fimm sæta ferðarafbíll.

Fyrsti Ford Mustang Mach-E rafbíllinn er lentur á Íslandi og kominn í sýningarsal Ford hjá Brimborg til sýnis og reynsluakturs. Mikilll áhugi hefur verið á bílnum og fór hann til að mynda beint í fyrsta sæti yfir selda bíla í Noregi í maí með tæp 1.400 seld eintök.

Sýningarbíllinn er búinn fjórhjóladrifi og 351 hestafla rafmótor sem skilar 660 Nm af togi og kemur bílnum í 100 km hraða á aðeins 5,1 sekúndu. Hann er búinn 98 kWh drifrafhlöðu sem skilar honum drægni upp á 540 km og kemst því til að mynda auðveldlega frá Reykjavík til Akureyrar á einni hleðslu.

Fæst nú sem fimm sæta ferðarafbíll

Hingað til hefur bíllinn aðeins fengist sem tveggja dyra sportbíll en í fyrsta skipti í 55 ára sögu bílsins er ný gerð sett á markað. Ford Mustang Mach-E er fimm sæta ferðarafbíll í flokki stærri bíla og er rúmir 4,7 metrar að lengd. Farangursrými að aftan er 402 lítrar og stækkanlegt með því að fella niður aftursætisbök og þar að auki er 100 lítra farangursrými að framan.

„Ford Mustang Mach-E rafbíllinn kemur á háréttum tíma fyrir orkuskiptin á Íslandi. Smellpassar við íslenskar aðstæður. Langdrægur, fjórhjóladrifinn, rúmgóður ferðarafbíll með jeppalagi og einstaklega mikla drægni á hreinu rafmagni sem kemur allri fjölskyldunni og farangri í einni lotu milli Reykjavíkur og Akureyrar sem er algengt viðmið," segir Egill Jóhannsson, forstjóri Brimborgar.

Allt að 610 km drægni

Ford Mustang Mach-E fæst í fjórum mismunandi gerðum og með tveimur stærðum af drifrafhlöðu fyrir mismunandi þarfir kaupenda. Með Long Range 98 kWh drifrafhlöðu og afturdrifi er drægnin skv. WLTP staðli allt að 610 km og með fjórhjóladrifi er drægnin 540 km. Með Standard Range 75 kWh drifrafhlöðunni og afturdrifi er drægnin 440 km og 400 km þegar valið er fjórhjóladrif.

Ford Mustang Mach-E er með 11 kW innbyggða hleðslustýringu sem gerir honum kleift að taka við þriggja fasa hleðslu (AC), bæði heima eða á vinnustaðnum. Þá er einnig hægt að hlaða bílinn í hraðhleðslu. Long Range útfærslan með 98kWh drifrafhlöðunni getur nýtt sér allt að 150 kW hraðhleðslustöð (DC) og hlaðið frá 10% í 80% á 45 mínútum. Standard Range 75 kWh útfærsluna er hægt að hlaða frá 10% í 80% á 38 mínútum í allt að 115 kW hraðhleðslustöð.

Ford Mustang Mach-E er hlaðinn staðalbúnaði. Framrúða og hliðarspeglar eru upphituð og farþegarými er alltaf heitt með aðstoð forhitara með tímastilli auk þess sem stýri er upphitað og leðurklætt og fjölstillanleg, framsætin eru upphituð. Hljómtækin eru frá B&O með 10 hátölurum, þráðlaus hleðsla fyrir farsíma, stór 15,5" snertiskjár, nálægðarskynjarar, lyklalaust aðgengi, Ford pass og sjálfvirk netuppfærsla hugbúnaðar (OTA).

Mustang Mach-E með Evrópubúnaði og lengri verksmiðjuábyrgð

Ford Mustang Mach-E bílar sem keyptir eru hjá Brimborg eru sérhannaðir fyrir Evrópu með búnaði og gerðaviðurkenningu fyrir Evrópu og uppfylla þannig allar skráningarkröfur á því markaðssvæði. Fjöðrun, stýri og driflína eru aðlöguð að evrópskum aðstæðum. Búnaður er m.a. miðaður við kalt loftslag og drægni miðast við evrópskar WLTP reglur. Leiðsögukerfi með Íslandskorti fylgir Evrópubílum ásamt hleðslukapli með TYPE2 tengi fyrir evrópskar aðstæður. 5 ára verksmiðjuábyrgð er á Ford Mustang Mach-E bílum og 8 ára ábyrgð á drifrafhlöðu sem keyptir eru hjá Brimborg.

Ford Mustang Mach-E kostar frá 6.890.000 krónum og er til sölu á netinu í vefsýningarsal Brimborgar.