*

Hitt og þetta 11. september 2020

Fréttaljósmynd ársins til sýnis

Stærsta fréttaljósmyndasamkeppni í heimi opnuð á ný í Kringlunni eftir nokkurra ára hlé. Farandsýning um allan heim.

Ljósmyndasýningin World Press Photo opnaði í dag í Kringlunni. Sýningin samanstendur af verðlaunaðri myndrænni blaðamennsku ársins 2019 auk stafrænna frásagna. Sýningin er sett upp í göngugötu á 1. og 2. hæð Kringlunnar. Hún er opin á afgreiðslutíma verslunarmiðstöðvarinnar og mun standa yfir til 2. október nk.

Mennta- og menningarmálaráðherra, Lilja Dögg Alfreðsdóttir, opnaði sýninguna formlega í dag auk þess sem Kristinn Magnússon, formaður Blaðaljósmyndarafélags Íslands, hélt stutt erindi. World Press Photo eru sjálfstæð samtök sem voru stofnuð í Hollandi árið 1955. Meginmarkmið þeirra er styðja við og kynna störf fréttaljósmyndara á alþjóðlegum vettvangi.

Farandsýning sem fer til 150 borga í 50 löndum

Í gegnum tíðina hefur World Press Photo byggt upp sjálfstæðan vettvang fyrir fréttaljósmyndun og frjálsa upplýsingamiðlun. Til að gera markmið sín að veruleika stendur World Press Photo fyrir stærstu og veglegustu samkeppni heims á sviði fréttaljósmynda á hverju ári. Vinningsmyndunum er safnað saman í farandsýningu sem árlega nær til 150 borga í yfir 50 löndum.

Að þessu sinni tóku þátt 4.282 atvinnuljósmyndarar frá 125 löndum og sendu inn 73.996 ljósmyndir. World Press Photo sýningin var áður haldin í Kringlunni í mörg ár og segja forsvarsmenn Kringlunnar ánægjulegt að geta boðið upp á hana á ný. Við hverja mynd er fróðlegur texti um myndefnið á íslensku og ensku.

Verðlaunamyndin frá mótmælum í Súdan

Ljósmynd sem dómnefnd útnefndi sem Fréttaljósmynd ársins var tekin af japanska ljósmyndaranum Yasuyoshi Chiba fyrir Agence France – Presse.  Myndin sýnir ungan mann, sem er lýstur upp af farsímum, flytja mótmælaljóð meðan mótmælendur kyrja slagorð og krefjast borgaralegrar stjórnar þegar slökkt var á ljósum í Khartoum, Súdan, 19. júní.

Dómnefndin veitti 44 ljósmyndurum verðlaun í 8 efnisflokkum og koma verðlaunahafar frá 24 löndum. Dutch Postcode Lottery er alþjóðlegi styrktaraðili World Press Photo auk Aegon og PwC. Kringlan stendur fyrir sýningunni hérlendis í samstarfi við Morgunblaðið.