*

Bílar 10. október 2017

Garðabær opnar hraðhleðslustöð fyrir rafbíla

Garðabær er fyrsta sveitarfélagið sem semur við aðila á einkamarkaði um uppsetningu hraðhleðslustöðvar.

Garðabær opnar nýja hraðhleðslustöð fyrir rafbíla í bílakjallaranum á Garðatorgi í miðbæ Garðabæjar miðvikudaginn 11. október kl. 14:30. Hraðhleðslustöðin er frá fyrirtækinu GARO/ Efacec á Íslandi og er 50 kW stöð og með þeim hraðari á landinu.

Hin nýja hraðhleðslustöð er einnig fyrsta stöðin á Íslandi sem er staðsett í bílakjallara sem ýtir undir betra aðgengi sérstaklega yfir vetrartímann. Á stöðinni verður hægt að hlaða tvo bíla í einu, einn á hraðhleðslu (DC) og einn á hámarkshleðslu (AC). Um 20-30 mínútur tekur að hlaða bíl í hraðhleðslu upp í 80-90%. Hleðsla á stöðinni verður ókeypis út árið í boði Garðabæjar og Orkusölunnar en á næsta ári verður tekið gjald af hleðslu hvers bíls þar sem verður hægt að nota Rfid lykla og app til að greiða fyrir notkun.

Garðabær, ásamt fleiri sveitarfélögum og orkufyrirtækjum, fékk í lok síðasta árs styrk frá iðnaðar- og viðskiptaráðuneytinu til uppbyggingar á innviðum fyrir rafbíla. Orkusjóður hafði umsjón með styrkumsóknunum og verkefnið er hluti af sóknaráætlun Íslands í loftslagsmálum. Verkefnið miðar að því að gert verði átak í að efla innviði fyrir rafbíla á landsvísu til að tryggja aðgengi sem flestra landsmanna að loftslagsvænum samgöngumáta. Garðabær fékk styrk til að setja upp hraðhleðslustöð sem nú er að opna á Garðatorgi. 

Í umhverfisstefnu Garðabæjar sem kom út fyrr á þessu ári er eitt af markmiðunum að Garðabær verði vistvænt bæjarfélag og umhverfið heilnæmt og aðlaðandi og ein leið til þess er að stuðla að notkun minna mengandi farartækja og vistvænna orkugjafa. Garðabær stefnir einnig að því að setja upp fleiri hleðslustöðvar/staura í bænum, t.d. við almenningsstæði íþróttamiðstöðva.

Glæsileg vígsla

Hraðhleðslustöðin á Garðatorgi verður tekin í notkun miðvikudaginn 11. október kl. 14.30. Við það tækifæri flytur Jóna Sæmundsdóttir formaður umhverfisnefndar Garðabæjar ávarp og Gunnar Einarsson bæjarstjóri Garðabæjar hleður fyrsta rafbílinn sem heimsækir stöðina. Framtíðarnotendur rafbíla, elstu nemendur leikskólans Bæjarbóls, mæta á staðinn og fá að fylgjast með hvernig rafbílar hlaðast. Boðið verður upp á tónlistaratriði og léttar veitingar í anda grænnar orku. Á staðnum verða einnig nokkrir rafbílar frá bílaumboðum.