*

Tíska og hönnun 22. september 2017

Geysir frumsýnir haust- og vetrarlínu sína

Skugga-Sveinn er fjórða lína Ernu fyrir Geysi en línan verður frumsýnd í Héðinshúsinu í kvöld kl 20:30.

Fatnaðurinn er innblásinn af íslensku konunni og hennar hversdagslífi í borginni, með sterkum vísunum í íslenskan lista- og menningarheim. Erna Einarsdóttir er yfirhönnuður Geysis. Hún nam við Gerrit Rietveld Akademíuna í Amsterdam og Central Saint Martins í London. 

Haustherferðin sækir nafn sitt í hið þekkta leikverk Skugga-Svein með skírskotun í  leiktjöld sem máluð voru af Sigurði málara Guðmundssyni fyrir fyrstu uppsetningu verksins árið 1862.

Sigurður málari var áhrifamikill listamaður en einnig mætti kalla hann fyrsta íslensku fatahönnuðinn í nútímamerkingu þess orðs en Sigurður skapaði nýjan íslenskan þjóðbúning kvenna á 19. öld sem íslenska fjallkonan hefur skartað alla tíð síðan.

Fyrstu 150 gestirnir sem mæta á svæðið í kvöld fá veglega gjafapoka með ýmsum glaðningum frá Geysi, MAC, Davines, Omnom, Súpubarnum, Sjávarsmiðjunni, Íslenskri Hollustu og Saltverk.

Vörurnar úr línunni koma í verslanir Geysis daginn eftir sýningu, laugardaginn 23. september.