*

Hitt og þetta 17. júní 2020

Góð ráð fyrir einokunarfyrirtæki

Jón Páll Hreinsson nefnir 4 ráð fyrir einokunarfyrirtæki til að losna við samkeppni, ekki mælir hann með notkun þeirra.

Jón Páll Hreinsson, bæjarstjóri í Bolungarvík og stjórnarmaður hjá Örnu mjólkurvörur, skrifaði pistil í dag á vef bb.is sem fjallar um hegðun einokunarfyrirtækja. Þar nefnir hann 4 góð ráð fyrir einokunarfyrirtæki sem vilja losa sig við samkeppnisaðila.

Bætir hann við að þessi ráð eru öll siðlaus en auk þess ólögleg og að hann mæli ekki með notkun þeirra fyrir neinn. Hins vegar með því að þekkja leiðirnar er auðveldara með að benda á slíka hegðun.

Ráð Jóns eru eftirfarandi:

1. Framleiddu eins vörur og samkeppnisaðilinn

Nýjir aðilar á markaði koma gjarnan inn með nýjar áherslur í vöruframboði. Þeir þróa vörur sem neytendum finnst vera spennandi og eru tilbúnir að færa sig frá einokunarfyrirtækinu sem ekki hefur sinnt því sem skyldi. Með því að kópera nýsköpun hins nýja samkeppnisaðila og þróa eins vörur (þótt þær heiti öðru nafni) minnkar þú sérstöðu hans.

2. Ráðast beint á sérstöðu litla samkeppnisaðilans

Ef samkeppnisaðilinn hefur náð að skapa sér sérstöðu, t.d. með því að bjóða uppá umhverfisvænar umbúðir, þá má alls ekki leyfa honum að komast upp með slíkt og bjóða umsvifalaust upp á eins pakkningar. Ef þú getur ekki boðið uppá eins pakkningar, þá má breyta pakkningum og merkja þær umhverfisvænar.

3. Hefja markaðsherferð hægt og rólega

Mikilvægt er að byrja ekki á stórri auglýsingaherferð þar sem þú berð þínar endurbættu vörur saman við samkeppnisaðilann og segir neytendum að vörur hans séu ekkert sérstakar. Frekar gera þetta hægt og rólega og smásaman hrekur þú nýja aðilann út af markaðinum. Ef þú gerir þetta með látum þá fatta neytendur hvað þú ert að gera og geta brugðist illa við.

4. Lækka verðið með afsláttum undir borðið

Ef ekkert gengur og neytendur halda áfram tryggð við litla samkeppnisaðilann, þá er eitt gamalt og gott ‚trix‘ sem hægt er að nota. Auðveldasta og skilvirkasta leiðin til að gera út af við minni samkeppnisaðila er nefnilega að lækka verðið, jafnvel niður fyrir kostnaðarverð, og hrekja hann þannig í þrot. En þar sem það er bannað, þá er ein leið framhjá því að bjóða uppá svokallaða „markaðsstyrki“, þá býður þú endursöluaðilum sama gamla verðið en greiðir samhliða styrki til þeirra á móti og lækkar þannig vöruna, þótt það komi hvergi fram.