*

Bílar 8. desember 2019

Hannaður í anda lúxussnekkja

Mercedes-Benz frumsýndi hugmyndabílinn Vision EQS á bílasýningunni í Frankfurt sem fór fram nýlega.

Mercedes-Benz frumsýndi hugmyndabílinn Vision EQS á bílasýningunni í Frankfurt sem fór fram nýlega. Bíllinn fékk að vonum mikla athygli á sýningunni enda sýnir hann framtíðina fyrir stóran, 100% rafknúinn lúxusbíl.

Vision EQS sýnir öflug áform Mercedes-Benz í rafbílavæðingunni. Vision EQS er með drægni upp á allt að 700 km samkvæmt WLTP stöðlum. Hann hefur 350 kW afl og togið er alls 760 Nm. Bíllinn fer úr kyrrstöðu í hundraiið á innan við 4,5 sekúndum. Hægt er að hlaða bílinn allt að 80% hleðslu á innan við 20 mínútum, en bíllinn er hannaður af EQ deild Mercedes-Benz.

Vision EQS er framúrstefnulegur í hönnun en um leið glæsilegur lúxusbíll. Bíllinn er búinn allri nýjustu tækni frá Mercedes-Benz og þar er m.a. að finna nýjustu útgáfuna af MBUX margmiðlunarkerfinu. Bíllinn er búinn nýjasta Level 3 kerfi í sjálfkeyrandi akstri og að sögn Mercedes-Benz verður bíllinn að fullu sjálfkeyrandi í nánustu framtíð. Þá er bíllinn með nýjustu tækni af Digital framljósum sem verða með sérlega öflugt 360° ljósabelti.

Innanrýmið er hannað í anda lúxussnekkja og mun bjóða upp á mestu þægindi og lúxus sem völ er á í bíl. Mælaborðið og stjórntakkar er sérlega nýstárlegt og sýnir hvað framtíðin mun bera í skauti sér. Hugmyndabíllinn Vision EQS markar tímamót að því leyti að þetta er fyrsti stóri lúxusbíllinn sem kemur fram á sjónarsviðið sem er hreinn rafbíll. Búist er við að EQS komi í framleiðslu eftir 2-3 ár.

Stikkorð: Mercedes-Benz  • Vision EQS