*

Bílar 21. október 2020

Heimsending á bílum í reynsluakstur

BL býður heimsendingu á reynsluakstursbílum og verðmat á núverandi heimilisbíl á meðan.

Bifreiðasalan BL, sem löngum var þekkt undir nafninu Bifreiðar og landbúnaðarvélar, hefur nú tekið upp þá nýbreytni að bjóða viðskiptavinum sem kjósa að fá sendan nýjan reynsluakstursbíl heim að dyrum í stað þess að gera sér ferð í sýningarsali fyrirtækisins við Sævarhöfða, Hestháls eða Kauptún.

Lánstíminn er eins og venja er varðandi reynsluakstur nýrra bíla og ákveðinn í samráði við viðkomandi söluráðgjafa hverju sinni.
Auk þess sem BL býður upp á heimsendingu á reynsluakstursbílum býðst viðskiptavinum einnig að fá söluskoðun og verðmat á núverandi heimilisbíl meðan á reynsluakstrinum stendur.

Heimsendingarþjónustan er sögð ekki hafa nein áhrif á starfsemi í sýningarsölum BL sem opnir eru samkvæmt venju virka daga og á laugardögum að því er fram kemur í tilkynningu fyrirtækisins, en hægt er að finna allar nánari upplýsingar um fyrirkomulag heimsendingarþjónustunnar á vefsíðu fyrirtækisins, bl.is.