*

Hitt og þetta 31. janúar 2014

Helgarfjör fyrir flipparana

Víða um borgina má skemmta sér um helgar þegar eftir krefjandi vinnuviku.

Lára Björg Björnsdóttir

Eftir erfiða vinnuviku er fátt meira afslappandi en að fara út í bæ og flippa aðeins út. 

Byrjaðu helgina á því að stelast í ljósritunarvélina í vinnunni og ljósritaðu 1.000 krónu seðil í 500 eintökum. Komdu við í Perlunni, klæddu þig fyrst í pels og skelltu á þig gerviskran­ hálsmeni, og stilltu þér upp í stiganum á efri hæðunum. Kastaðu seðlunum fram af stigapallinum og horfðu á þá svífa niður í gosbrunninn. Láttu alla halda að þú sért milljarðamæringur þar sem þú gólar niður til fólksins sem kastar tíköllum í brunninn, á ensku með rússn­ eskum hreim, að þér finnst tími til kominn að gefa til baka.

Á meðan þú ert í nágrenninu gætir þú rölt niður í Öskjuhlíð. Þar skaltu stoppa fólk sem er á gangi og banna því að fara um stígana. Segðu að það sé boðhlaup í gangi eða að það sé dresskód og viðkomandi sé ekki klæddur í nógu flott útivistarföt. Þú getur líka sagt að Öskjuhlíðin sé lokuð vegna þess að nú sé verið að veiða kanínur fyrir næstu jólavertíð í Melabúðinni.

Á laugardeginum skaltu fara niður á tjörn í þínu fínasta pússi. Það skiptir máli að vera ekki klædd eins og umrenningur þegar flippið er tekið. Rífðu upp bolluvönd og eltu gæsir og endur um tjarnarbakkann og reyndu að slá þær á afturendann.

Síðar um daginn skaltu rölta upp á Klambratún og klæða þig upp sem dauðinn eða norski listamaðurinn Odd Nerdrum. Taktu orf og ljá og byrjaðu að slá grasið. Þegar túristar nálgast þig skaltu rukka þá um gjald ef þeir ætla að ganga yfir grasið. Segðu þeim að þú eigir pleisið og að þú hafir keypt það fyrir slikk í hruninu.

Skelltu þér að lokum í Hörpu og hlauptu um húsið með gjall­ arhorn og gaulaðu „Satan“ ef þú ert á móti húsinu eða góðærinu (eða hvoru tveggja).

Stikkorð: Stuð  • Gaman  • Fjör