*

Bílar 30. nóvember 2020

Highlander kemur til Íslands

Toyota Highlander verður kynntur í janúar, en um er að ræða stóran stóran sportjeppa með hybrid bensínvél.

Róbert Róbertsson

Toyota á Íslandi fær flotta viðbót í vörulínuna í janúar 2021 þegar Toyota Highlander verður kynntur í fyrsta sinn í Vestur Evrópu. Þessi bíll hefur notið mikilla vinsælda víða um heim frá því hann kom fyrst á markað árið 2000, ekki síst í Bandaríkjunum.

Highlander er stór sportjeppi með góða aksturseiginleika og mikið innanrými, 2 tonna dráttargetu og veghæð sem sæmir öflugum sportjeppa eða 20,3 cm. Hröðun frá 0-100 km/klst. er 8,3 sekúndur. Highlander er í flokki E-SUV bíla þar sem Land Cruiser hefur verið í forystu hér á landi undanfarna áratugi.

Með þessu skrefi býður Toyota upp á enn fleiri lausnir í einum kröfuharðasta og vinsælasta flokki bíla á Íslandi með tæknilega vönduðum og sérstaklega rúmgóðum Hybrid sportjeppa. Tvö niðurfellanleg sæti eru aftast í bílnum og er því pláss fyrir 7 í Highlander.

Toyota Highlander Hybrid er með AWD-I fjórhjóladrif og  verður í boði í þremur útfærslum,  GX, VX og Luxury. Highlander er  knúinn áfram af fjórðu kynslóð Hybrid tækninnar auk bensínvélar sem skila samanlagt 244 hestöflum. Þetta er því stór og öflugur bíll en eyðslan er samt hófleg eða frá 5,8 – 8,2 lítrar á 100 km. Eyðslan fer eftir aksturslagi, ökuhraða og ytri aðstæðum.

Toyota Highlander er stór og stæðilegur sportjeppi, 4,95 m langur með 658 lítra farangursrými. Auðvelt er að fella niður tvær sætaraðir og mynda þannig 1.909 lítra farangursrými með sléttu gólfi. Highlander er búinn Toyota Safety Sense 2.5 sem er nýjasta útgáfa af öryggiskerfi Toyota.

Stikkorð: sportjeppi  • Toyota Higlander