*

Tölvur & tækni 29. nóvember 2019

Hljóðlátari fartölvulyklaborð í vændum

Apple og Google hafa hannað ný og hljóðlátari lyklaborð fyrir nýjustu fartölvurnar sínar.

Nýja 16“ útgáfan af MacBook Pro fartölvunni vinsælu verður með mun hljóðlátara lyklaborði en áður hefur þekkst. Takkarnir verða hannaðir á hátt sem kenndur hefur verið við skæri (scissor-mechanism), sem sagt er að muni bæta úr þeim ýmsu göllum sem fylgt hafi fiðrilda-hönnuninni sem á undan kom.

Þá verður nýjasta útgáfa svokallaðra Pixelbook frá Google – sem eru ódýrar en afllitlar tölvur sem keyra á stýrikerfi frá Google sjálfu í stað Windows – að sama skapi með svokallaða suss-takka (hush keys).

Blaðamaður Wall Street Journal hljóðprufaði fartölvulyklaborðin nýju í hljóðeinangruðum klefa. Skemmst er frá því að segja að hljóðstyrkur gamla MacBook lyklaborðsins var að meðaltali 41,9 desíbel, en það nýja mældist aðeins 30,3.

Suss-takkarnir á nýju Pixelbook Go slógu nýja Apple lyklaborðinu við með naumindum, en þeir mældust 30,1 desíbel. Til samanburðar voru Surface Laptop 3 frá Microsoft og Dell XPS 13 einnig hljóðmældar, en lyklaborð þeirra mældust 33,8 og 32,3 desíbel, í sömu röð.

Hafa ber í huga að desíbelskalinn er ekki línulegur, heldur er tvöfalt hærri tala margfalt hærra hljóð. Venjulegt samtal mælist um 60 desíbel, ferð í neðanjarðarlest um 95 desíbel, og högghamar um 130 desíbel.