*

Bílar 27. október 2021

Hulunni svipt af BMW iX

BMW iX er fjórhjóladrifinn og rúmgóður rafbíll sem óhætt er að fullyrða að setji ný viðmið í flokki rafknúinna sportjeppa.

Hulunni verður svipt af BMW iX nk. laugardag þegar bíllinn verður frumsýndur hjá BL kl. 12-16. Um er að ræða nýtt flaggskip rafbíla þýska lúxusbílaframleiðandans.

BMW iX er fjórhjóladrifinn og rúmgóður rafbíll sem óhætt er að fullyrða að setji ný viðmið í flokki rafknúinna sportjeppa. Sportjeppinn er boðinn í tveimur mismunandi útfærslum hvað afköst varðar; annars vegar BMW iX xDrive40 og hins vegar BMW iX xDrive50 og eru báðar gerðir fáanlegar í nokkrum mismunandi búnaðarútfærslum; Atelier, Loft, Suite Sport og Lounch Edition.

Sportjeppinn er með 426 km eða 630 km drægni. BMW iX xDrive40 er 326 hestöfl og hröðun úr kyrrstöðu í 100 km/klst. er um 6 sekúndur. Háspennt rafhlaða iX xDrive40 er 76,6 kWh sem veitir allt að 425 km drægni á hleðslunni samkvæmt WLTP. BMW iX xDrive50 er 523 hestöfl og er snerpan úr kyrrstöðu í 100 km/klst. 4,8 sekúndur. Rafhlaða BMW iX xDrive50 er 111,5 kWh sem hefur allt að 630 km drægni.

Skjót hleðsla

Hin nýja hleðslutækni BMW Group gerir kleift að hlaða um 120 km drægni á 10 mínútum á rafhlöðina í DC hraðhleðslustöð. Hleðsla frá 10% til 80% tekur innan við 40 mínútum og með 11 kW hleðslustöð tekur innan við ellefu klukkustundir að hlaða háspennta rafhlöðuna frá 0% í 100%.

BMW iX er rúmgóður fjórhjóladrifinn fimm manna bíll, sem byggður er á skalanlegum undirvagni úr áli og koltrefjum. Til útskýringar er BMW iX svipaður að lengd og breidd og BMW X5 xDrive og hæð yfirbyggingarinnar er svipuð og á X6 xDrive. Rafbíllinn iX er búinn sérlega glæsilegu og tæknivæddu farþegarými ásamt öryggis- og aðstoðarkerfum, að ekki sé talað um ríkulegan þægindabúnað fyrir ökumann og farþega eins. Ítarlegar upplýsingar um mismunandi staðalbúnað, fáanlegan aukabúnað, helstu mál og fleira er við kemur iXer að finna á bmw.is.

Háþróuð tækni og mikil þægindi

Allar megineiningar drifrásarinnar, svo sem mótorar, rafeinda- og hleðslutækni auk háspenntra rafhlaðanna sem sérstaklega voru þróaðar fyrir BMW iX, voru alfarið þróaðar af sérfræðingum BMW Group. Þá er tölvukerfi iX margfalt öflugra en sést hefur áður í fjöldaframleiddum bíl, sem gerir m.a. kleift að nýta 5G-tæknina til að láta iX aka án aðstoðar eða leggja sjálfur í stæði. BMW iX er jafnframt búinn radar- og litaskynjun til að bera kennsl á mismunandi fyrirbrigði í umhverfinu, innfelldum hurðarhúnum og flötu gólfi til að hámarka rými farþeganna, ekki síst þess sem situr í miðju aftursætisins. Tveir stórir og bogadregnir skjáir eru áberandi í mælaborðinu, annar 15" og hinn 12,3" veita góða góða stjórn yfirsýn fyrir ökumann og farþega auk þess sem glerþak iX er það stærsta til þessa frá BMW.

Stikkorð: BMW  • iX