*

Ferðalög 23. apríl 2013

Hvaða þjóðir eru heiðarlegustu ferðamennirnir?

Sumir stela aldrei neinu af hótelum á meðan aðrir skella sér á lampa eða jafnvel sængurföt.

Hotels.com gerði athugun á heiðarleika ferðamanna miðað við hvaðan þeir koma. Ýmislegt áhugavert kom í ljós.

Það er til dæmis mjög ólíklegt að ferðamenn frá Danmörku steli af hótelum á meðan ferðamenn frá Kólumbíu viðurkenna sjálfir að þeir yfirgefi hótel gjarnan með meira en þegar þeir tékkuðu sig inn.

Í könnuninni voru 8600 manns frá 28 löndum og borgum og spurt var um þjófnað á ferðalögum.

88% ferðamanna frá Danmörku sögðust aldrei hafa tekið neitt úr hótelherbergjum en aðeins 43% ferðamanna frá Kólumbíu sögðust aldrei hafa stolið neinu úr hótelherbergjum. 

Samkvæmt könnuninni eru Brasilíumenn heiðarlegastir Suður-Ameríkuþjóða, Hong Kong búar heiðarlegastir Asíuþjóða og ferðamenn frá Quebec í Kanada heiðarlegastir Norður-Ameríkuþjóða.

Algengustu hlutir sem ferðamenn stela úr hótelherbergjum eru tímarit og bækur. Sumar þjóðir eru hrifnari af sængurfötum og handklæðum á meðan Kínverjar eru þekktari fyrir að kippa með sér lömpum, klukkum og listmunum. Sjá nánar á CNN.

Hér má sjá listann eftir heiðarleika:

  • Danmörk 88%
  • Holland 85%
  • Noregur 84%
  •  Brasilía 81%
  •  Kanada (Quebec) 81%
  •  Hong Kong 81%
  •  Ítalía 80%
  •  Rússland 79%
  •  Tævan 78%
  •  Suður-Kórea 78%
  •  Argentína 77%
  •  Singapúr 77%
  •  Írland 75%
  •  Bretland 74%
  •  Sviss 73%
  •  Nýja Sjáland 73%
  •  Japan 73%
  •  Finnland 73%
  •  Þýskaland 72%
  •  Ástralía 72%
  •  Frakkland 71%
  •  Kanada (fyrir utan Quebec) 70%
  •  Bandaríkin 66%
  •  Kína 66%
  •  Svíþjóð 65%
  •  Spánn 64%
  •  Indland 62%
  •  Mexíkó 60%
  •  Kólumbía 43%

 

Stikkorð: Hótel  • Þjófar  • Ferðalög