*

Menning & listir 4. september 2019

Hvítur, hvítur dagur á hvíta tjaldið

Ný mynd Hlyns Pálmasonar hefur verið seld til 30 landa, nú síðast til sýninga í kvikmyndahúsum Norður Ameríku.

Kvikmyndin Hvítur hvítur dagur hefur verið seld til yfir 30 landa, og nýlega bættust við sölur til Bandaríkjanna og Kanada en myndin á Norður-Ameríku frumsýningu á hinni virtu Toronto kvikmyndahátíð þann  9.september næstkomandi.
Alþjóðlegt sölufyrirtæki myndarinnar er New Europe Film Sales en Film Movement mun sjá um dreifingu myndarinnar í Bandaríkjunum.

Meðal annarra landa sem myndin hefur verið seld til má nefna til Svíþjóðar, Danmerkur, Noregs, Frakklands, Sviss, Bretlands, Spánar, Póllands, Ástralíu, Nýja-Sjálands, Ungverjalands, Þýskalands, Austurríkis, Kína, Grikklands, Tékklands, Slóvakíu, Írlands, Rússlands, Belgíu, Hollands, Lúxemborg, Eistlands, Lettlands, Litháen, Bosníu- og Hersegóvínu, Króatíu, Norður-Makedóníu, Svartfjallalands, Serbíu og Slóveníu.

Hlynur Pálmason leikstýrir og skrifar handritið að Hvítum, hvítum degi. Framleiðandi myndarinnar er Anton Máni Svansson fyrir Join Motion Pictures og einn af yfirframleiðendum er Guðmundur Arnar Guðmundsson, en
myndin er íslensk/dönsk/sænsk samframleiðsla.

Vakti athygli með fyrstu myndinni sem staðfest er með þessari

Forstjóri Film Movement, Michael Rosenberg, segir Hlyn leikstjóra myndarinnar hafa vakið athygli alþjóðlega kvikmyndasamfélagsins með fyrstu mynd sinni. „Með sinni fersku frásagnarhæfileikum sem sést mjög skýrlega í hans næstu mynd, Hvítur, hvítur dagur, staðfestir hann stöðu sína sem einn af mest spennandi nýju hæfileikamönnum kvikmyndaheimsins,“ segir Rosenberg.

„Við erum mjög spennt fyrir því að deila þessari átakanlegu og öflugu mynd með bandarískum áhorfendum.“ Jan Naszewski, framkvæmdastjóri New Europe Film Sales í Varsjá segist mjög ánægður með að myndin sé í góðum höndum og bandarískir áhorfendur geti notið hennar á hvíta tjaldinu.

Lögreglustjóri með þráhyggju

Myndin fjallar um Ingimund, leikin af Ingvari E. Sigurðssyni, , en hann er lögreglustjóri sem hefur verið í starfsleyfi frá því að eiginkona hans lést óvænt af slysförum. Í sorginni einbeitir hann sér að því að byggja hús fyrir dóttur sína og afastelpu, þar til athygli hans beinist að manni sem hann grunar að hafi átt í ástarsambandi við konu sína.

Fljótlega breytist grunur Ingimundar í þráhyggju og leiðir hann til róttækra gjörða sem óhjákvæmilega bitnar einnig á þeim sem standa honum næst. Þetta er saga um sorg, hefnd og skilyrðislausa ást.

Auk Ingvars eru helstu leikendur þau Ída Mekkín Hlynsdóttir, Hilmir Snær Guðnason.  Arnmundur Ernst Backman, Björn Ingi Hilmarsson, Elma Stefanía Ágústsdóttir, Haraldur Ari Stefánsson, Laufey Elíasdóttir, Sara Dögg Ásgeirsdóttir, Sigurður Sigurjónsson, Sverrir Þór Sverrisson og Þór Tulinius.