*

Menning & listir 25. júlí 2013

Íslenski Expo skálinn settur upp á Miðbakka

Yfir þrjár milljónir manna hafa séð 360 gráðu kvikmynd sem tekin hefur verið til sýninga í íslenska Expo skálanum á Miðbakka.

Íslenski Expo skálinn frá heimssýningunni í Shanghai 2010 og Bókamessunni í Frankfurt 2011 hefur verið settur upp í Brim-húsinu á Miðbakka við Reykjavíkurhöfn.

Í skálanum er sýnd 360 gráðu kvikmynd þar sem veggir og loft mynda sjónræna heild en myndin var framleidd af Sagafilm.

Myndin er fimmtán mínútur að lengd og sýnir Ísland í öllum sínum fjölbreytileika. Myndskeiðum frá náttúru og borg er varpað á fjórar hliðar og loft skálans sem saman mynda teningu utan um gesti skálans. Ný tækni, þróuð af Sagafilm var notuð við upptökur. Fjórar samtengdar tökuvélar festu landið á filmu, frá lofti, láði og legi. Markmið myndarinnar er að skapa einfalda og áhrifaríka undraveröld sem fær gesti til að nema staðar, draga djúpt að sér andann og upplifa Ísland í návígi.

Veggir og loft mynda sjónræna, lifandi heild og mannlíf Íslands er speglað í sterkum tengslum við frumkrafta náttúrunnar. Tónlistin við kvikmyndina er eftir Hilmar Örn.

Yfir þrjár milljónir manna hafa nú þegar séð myndina og hófust sýningar í Brim-húsinu síðastliðna helgi. Aðsóknin var góð og sáu hátt í þrjú hundruð manns myndina þessa fyrstu sýningarhelgi.

Skálinn er opinn frá 10-22 alla daga og er aðgangseyrir 1500 krónur. Myndin er sýnd á heila og hálfa tímanum.