*

Matur og vín 6. ágúst 2020

Íslenskt viskí vinnur til gullverðlauna

Flóki Single Malt Whisky frá Eimverk Distillery vann gullverðlaun í London Spirits Competition 2020, mánudaginn síðastliðinn.

Flóki Single Malt Whisky frá Eimverk Distillery vann gullverðlaun í London Spirits Competition 2020, mánudaginn síðastliðinn.

Keppnin hófst 6 Júlí og voru yfir 1000 vörur skráðar frá 69 löndum, þar af 122 viskí. Flóki er fyrsta og eina íslenska viskíið og er framleitt úr íslensku byggi af Eimverk Distillery í Garðabænum. Nú þegar, hefur Flóki náð nokkuð góðum árangri á erlendum mörkuðum og er í dag fluttur út til yfir 20 landa, þar með talið til Þýskalands, Frakklands, Bandaríkjanna, Kína og Japan. Flóki hlaut 93 stig í keppninni og aðeins 3 önnur viskí hlutu gullverðlaun af 122.

Bragð vörunnar vegur hæst í stigagjöf og gefur allt að 50 stig. Síðan eru 25 stig gefin fyrir verðgildi og 25 stig fyrir útlit og framsetningu.

“Við erum gríðarlega ánægð og stolt af þessum árangri. Við eigum stórkostlega gott vatn og bygg hér á Íslandi og undanfarin 10 ár höfum við stöðugt verið að bæta okkur í viskígerð,” segir Haraldur Þorkelsson forstjóri Eimverks.

Eimverk Distillery var stofnað árið 2011 með það að markmiði að þróa og framleiða íslenskt viskí úr 100% íslenskum hráefnum. Flóki kom fyrst á markað árið 2014 og hefur verið í stöðugri þróun undanfarin 10 ár. Eimverk býður upp á verksmiðjuheimsóknir fyrir þá sem hafa áhuga á að kynna sér framleiðsluna og vöruna nánar. Flóki viskí er fáanlegt í Fríhöfninni, ÁTVR og á betri veitingastöðum landsins.