*

Bílar 24. febrúar 2017

Jaguar bílar frumsýndir

Bílaumboðið BL hefur nú formlega bætt við sig lúxusmerkinu Jaguar í flóru fyrirtækisins.

Bílaumboðið BL hefur nú formlega bætt við sig lúxusmerkinu Jaguar í flóru fyrirtækisins. Verður af því tilefni haldin vegleg bílasýning í Listasafni Reykjavíkur í Hafnarhúsinu á morgun, laugardag milli kl. 13 og 17.

Á sýningunni verða frumsýndar fimm nýjar og gamlar gerðir af Jaguar; sportjeppinn Jaguar F-Pace, fjölskyldusportbílarnir Jaguar XE og XF í fjórhjóladrifnum útgáfum, sportbíllinn Jaguar F-Type sem frumsýndur verður í fyrsta sinn í Evrópu í Listasafni Reykjavíkur í nýrri útgáfu. Bíllinn var fenginn að láni af þessu tilefni ásamt og síðast en ekki síst hinum goðsagnakennda Jaguar E-Type árgerð 1969, sem af mörgum er talinn einn fallegasti bíll sem hannaður hefur verið.

Jaguar F-PACE er fyrsti jeppinn frá Jaguar. Hægt er að velja um nokkrar mismunandi dísilvélar í F-Pace, 180 hestafla dísil, 240 hestafla dísil eða 340-380 hestafla SuperCharged bensínvél. Allir Jaguar F-Pace jepparnir eru með 8 þrepa sjálfskiptingu. Farangursrýmið er með því sem best gerist í þessum flokki eða 650 lítrar. Margmiðlunarbúnaður með íslensku leiðsögukerfi er staðalbúnaður í sumum gerðum af F-Pace en fáanlegt í allar gerðirnar.

Jaguar XE og XF eru sportlegir fjölskyldubílar í millistærðarflokki sem auk ríkulegs búnaðaðar koma með sparneytnum dísil- eða bensínvélum. Í þessum bílum eru sömu vélar í boði og í F-Pace, þó meiri áhersla sé lögð á sparneytnu 180 og 240 hestafla Ingeniumdísilvélarnar. XE og XF er einnig hægt að fá með 340 hestafla bensínvél og í stærri gerðina, XF, er að auki hægt að fá 380 hestafla bensínvél. Í þessum gerðum verður mest áhersla lögð á að panta bílana með nýja ASPC fjórhjóladrifskerfinu frá Jaguar. Margmiðlunarbúnaður með íslensku leiðsögukerfi er staðalbúnaður í sumum gerðum en fáanlegt í allar gerðirnar.

Stikkorð: bílar  • BL  • Jaguár