*

Bílar 23. júlí 2019

Jaguar XJ verður rafbíll

Jaguar XJ, flaggskip breska bílaframleiðandans, gengur í endurnýjun lífdaga sem rafknúinn lúxusbíll.

Jaguar XJ, flaggskip breska bílaframleiðandans, gengur í endurnýjun lífdaga sem rafknúinn lúxusbíll.

Í samræmi við stefnu sína um að bjóða alla bílgerðir Jaguar Land Rover með rafmótor frá og með 2020 hefur verksmiðja fyrirtækisins í Castle Bromwich í Bretlandi nú verið undirbúin fyrir breytingarnar því 2021 kemur flaggskip Jaguar, stóri lúxusbíllinn XJ, á markað sem 100% rafbíll, en framleiðslu sama bíl með núverandi drifrás hefur verið hætt. Jaguar XJ hefur verið á markaði í rúma fimm áratugi og á þeim tíma gengið í gegnum átta kynslóðaskipti samfara stöðugri tækniþróun og breyttum straumum og stefnum í bílgreininni. 

Þessi rúmgóði og stóri lúxusbíll hefur frá upphafi verið hannaður, þróaður og framleiddur í Bretlandi og fluttur út til meira en 120 landa um allan heim frá árinu 1968. Rafknúni lúxusbíllinn Jaguar XJ mun að stórum hluta byggja á fagurfræðilegri árfleifð forvera síns ásamt rómuðum afköstum og munaði. Hönnuðir og verkfræðingar nýja bílsins verða þeir sömu og tryggt hafa Jaguar I-Pace helstu verðlaun í bílaheiminum vestanhafs og austan á árinu.

Nýtt skref í orkuskiptunum

Þessi ákvörðun stjórnenda Jaguar Land Rover um endurnýjun lífdaga Jaguar XJ mun tryggja áframhaldandi störf þúsunda starfsmanna fyrirtækisins í Bretlandi ásamt því sem ákvörðunin markar nýtt skref í orkuskiptum fyrirtækisins. Í janúar var tilkynnt um nýja framleiðslulínu fyrir nýja drifrás rafhlöðu og rafmótors (EDU) sem sett verður upp í verksmiðjunni í Midlands auk þess sem verksmiðjan þar verður stækkuð og endurbætt á ýmsan máta.

Ný samsetningarmiðstöð Jaguar Land Rover fyrir rafhlöður, sem tekur til starfa í Hams Hall á næsta ári, mun afkasta 150 þúsund framleiðslueiningum á ári og verður hún sú fullkomnasta sinnar tegundar í Bretlandi. Ásamt vélaverksmiðjunni (EMC) í Wolverhampton munu verksmiðjurnar tvær bera hitann og þungann af framleiðslu næstu kynslóða bíla frá Jaguar Land Rover sem allar verða boðnar með rafmótor, ýmist sem tvinnbílar eða hreinir rafbílar.

Bretland verði sjálfbærara

Í samræmi við þá skuldbindingu Jaguar Land Rover að framleiða rafknúna bíla í Bretlandi er það jafnframt nauðsynlegt að mati fyrirtækisins að stjórnvöld og aðrir bílaframleiðendur í Bretlandi taki höndum saman um að setja á stofn afkastamikla rafhlöðuverksmiðju í landinu sem framleiði minni, afkastameiri og ódýrari rafhlöður en nú eru fáanlegar á markaðnum. Þessi mikilvægu skref munu einnig styðja við og efla núverandi aðfangakeðju sem gera mun Bretland óháðara erlendum mörkuðum sem nú þjónusta breska bílaiðnaðinn.