Jessica Simpson fær milljónir fyrir megrunina

Bandaríska leikkonan Jessica Simpson hefur skrifað undir samning við megrunarfyrirtækið Weight Watchers, sem felur í sér að hún fær greiddar þrjár til fjórar milljónir dala, andvirði 375-500 milljóna króna, ef henni tekst að losa sig við þau þrjátíu kíló sem hún bætti á sig á meðgöngunni. Jessica eignaðist dóttur þann fyrsta maí síðastliðinn.

Weight Watchers hefur lengi nýtt sér krafta Hollywood-leikara og annars frægs fólks til að auglýsa vörur sínar og þjónustu. Má sem dæmi nefna sjónvarpsmanninn og fyrrverandi körfuboltahetjuna Charles Barkley, sem hefur tekið á sig sambærilegar raunir og Jessica fyrir Weight Watchers. Ekki er vitað hvað hann fær fyrir „Lose Like a Man“ herferðina, en sérfróðir giska á að launin séu í kringum þrjár milljónir dala.