*

Matur og vín 30. nóvember 2017

Karamellubitar með Hockey Pulver

Rosalegar karamellur sem gleðja bragðlaukana.

„Það er einfaldara að búa til karamellu en margir halda, það þarf til dæmis ekki hitamæli til að gera þessa. Þegar karamella er útbúin þá þarf að fylgja nokkrum reglum, þá gengur þetta eins og í sögu,“ segir Linda Ben sem heldur úti dásamlega matarblogginu www.lindaben.is 

„Það sem þarf að gera er að fara mjög varlega, passa að hitinn dreifist vel um pottinn og passa að sykurinn brenni ekki. Mér finnst best að setja sykurinn í stóran pott og á stóra hellu, hafa hitann lágann og hræra nánast ekkert í sykrinum á meðan hann bráðnar. Það má aldrei líta af pottinum á meðan karamellan er útbúin, það kveiknar í sykrinum ef hann hitnar of mikið. Þegar þú sérð að sykurinn er byrjaður að dökkna skelltu þá litlu smjöri út í sykurinn og það stoppar brunann, hrærðu svo smjörinu saman við sykurinn. Ef karamellan endar kekkjótt er alltaf hægt að sigta hana. Aldrei smakka karamelluna á meðan hún er heit eða sleikja áhaldið sem þú notar, karamella er gríðarlega heit og þú munt brenna þig illa.“

Hockey Pulver Karamellur

  • 200 g sykur
  • 100 g smjör
  • 60 ml rjómi
  • 2 dollur Hockey pulver

Aðferð:

  1. Sykurinn er bræddur í stórum potti við lágan hita.
  2. Smjörið er skorið í 6 bita og einn biti settur út í sykurinn í einu og hrært vel á milli, lækkið hitann.
  3. Rjómanum er hellt út á sykurblönduna í litlum skömmtum og hrært vel á milli. Látið karamelluna sjóða í um 1 mín.
  4. Slökkvið undir pottinum og setjið smjörpappír í lítið eldfast mót (15×25 cm eða álíka).
  5. Hellið ½ dós af hockey pulver út í karamelluna og blandið saman. Hellið karamellunni í eldfasta mótið og hellið restinni af hockey pulverinu yfir karamelluna.
  6. Leyfið karamellunni að stirna, gott að setja hana inn í ísskáp til að flýta ferlinu. Takið karamelluna úr smjörpappírnum og setjið á skurðarbretti.
  7. Skerið endana af karamellunni sem láu upp við eldfasta mótið. Skerið svo karamelluna fyrst í lengju og svo í kassa, persónulega finnst mér best að hafa hvern bita frekar lítinn en það er smekksatriði.
  8. Setjið Hockey pulver í skál og veltið bitunum upp úr duftinu þannig að hver biti þekist vel (þægilegra að setja bara nokkra bita ofan í skálina í einu).

Fyrir áhugasama er hægt að fylgjast nánar með Lindu á Instagram síðu hennar.