*

Bílar 6. nóvember 2020

Kia Sorento vinnur Gullna stýrið

Kia Sorento vann til verðlauna í Þýskalandi í gær. Fjórða kynslóð Sorento er komin á markað, bíllinn er sjö manna.

Nýr Kia Sorento var sæmdur hinu eftirsótta Gullna stýri en tilkynnt var um verðlaunin í Þýskalandi í gær. Kia Sorento hafði betur í úrslitum við Aston Martin DBX og BMW X6 í flokki stórra sportjeppa.

Verðlaunin eru talin þau eftirsóttustu í bílaiðnaðinum í Þýskalandi en það eru fjölmiðlarnir Auto Bild og Bild am Sonntag sem standa að verðlaununum sem voru fyrst veitt árið 1976.

Fjórða kynslóð Kia Sorento er nýkomin á markað og hefur fengið mjög góðar viðtökur. Þessi stóri og stæðilegi bíll er enn rúmbetri en forveri hans og er sjö manna. Bíllinn hefur auk þess mikla dráttargetu. Sorento kemur nú með þremur mismunandi orkugjöfum; sem tengiltvinnbíll (Plug-in Hybrid), tvinnbíll (Hybrid) og í dísilútfærslu.

,,Hinn nýi Kia Sorento er afbragðsgóður bíll. Akstureiginleikarnir eru sérlega góðir og hönnunin mjög vel heppnuð. Það er mikið pláss fyrir fólk og farangur, hönnun innra rýmisins er mjög góð sem og tækni og öryggisatriði," segir Tom Drechsler, aðalritstjóri Auto Bild.

,,Við erum mjög stolt af þessum verðlaunum og að fjölmargir lesendur Auto Bild og Bild am Sonntag telji að Kia Sorento sé besti bíllinn í sínum flokki. Það er mjög ánægjulegt að Kia sé fyrir ofan tvö lúxusbílamerki Aston Martin og BMW sem segir okkur að Kia hafi hækkað upp í lúxusflokkinn með hinum nýja Sorento," segir Steffen Cost, framkvæmdastjóri Kia Motors í Þýskalandi.

Nýr Sorento var frumsýndur hjá Öskju í síðustu viku. "Viðtökur hafa verið frábærar, enda er Sorento vel heppnaður bíll og kaupendahópurinn traustur hér á landi. Bíllinn skarar fram úr á ýmsum sviðum og hefur Arctic Edition útfærslan með 3,5 cm. upphækkun og 32" dekkjum vakið athygli. Þá er 2.500 kg. dráttargetan að heilla marga", segir Þorgeir R. Pálsson, sölustjóri Kia hjá Öskju.

Stikkorð: Kia  • Sorento