*

Bílar 9. apríl 2020

Kia Telluride valinn heimsbíll ársins 2020

Kia Telluride er nýr sportjeppi sem framleiddur er sérstaklega fyrir Bandaríkjamarkað.

Kia Telluride var valinn heimsbíll ársins 2020 en verðlaunin voru veitt í Toronto í Kanada í gær.

Kia Telluride er nýr sportjeppi sem framleiddur er sérstaklega fyrir Bandaríkjamarkað. Kia vann tvo flokka í þessu eftirsóknarverða vali en rafbíllinn Kia Soul EV vann flokk borgarbíla. Kia Soul EV hefur verið mjög vinsæll hér á landi sem víða erlendis. Porsche Taycan vann tvo flokka; lúxusbíll ársins 2020 og sportbíll ársins 2020. Mazda 3 fékk hönnunarverðlaun ársins 2020.

„Allir hjá Kia eru heiðraðir með þessum verðlaunum. Við unnum ekki ein heldur tvenn verðlaun hjá dómnefndinni í vali á heimsbíl ársins," sagði Thomas Schemera yfirmaður vörudeildar hjá Kia Motors Corporation. „Þetta eru ein eftirsóttustu verðlaunin á heimsvísu í bílabransanum. Þetta er til votts um það að Telluride og Soul EV eru framúrskarandi bílar. Þessi verðlaun bera með sér hversu hæfileikaríkt og duglegt teymið er á heimsvísu og hversu hart allir sækja að því að framleiða eftirsótta gæða bíla sem hafa gott notagildi og ökumenn elska," bætti Schemera við.

Þetta er í 15. skipti sem verðlaunin eru veitt í samvinnu við Bílasýninguna í New York en henni hefur nú verið frestað fram í ágúst.

Stikkorð: Kia  • Telluride