*

Bílar 4. janúar 2013

Konungur lúxusjeppanna - upphafið

Í upphafi var helsti lúxusinn í Range Rover jeppunum teppi á gólfum. Það átti eftir að breytast.

Hugmyndina að Range Rover jeppanum má rekja allt aftur til ársins 1958. Þá vildu forsvarsmenn Rover bílaverksmiðjanna smíða stærri jeppa en gamla Land Roverinn. Árið 1966 hófst loks hönnunarvinna að fyrstu kynslóð jeppans eftir nokkrar misheppnaðar hugmyndir árin á undan. Á árunum 1967 til 1970 voru smíðaðir 40 þróunarbílar.

Í dag væru slíkir bílar vandlega huldir og haldið frá augum almennings. Rover menn fóru hins vegar þá leið að merkja 26 þeirra Velar, nafni félags sem þeir skráðu í bresku fyrirtækjaskrána, og setja þá á númeraplötur. Velar getur hafa merkt tvennt, VEightLandRover (V8LandRover) og hylja eða fela sem dregið er af ítalska orðinu velare.

Var ekki lúxusjeppi í upphafi

Range Rover var frumsýndur árið 1970. Hönnun hans vakti mikla athygli. Hið virta Louvre safn í París sýndi bílinn ári seinna og sagði hann einstaka iðnhönnun. Mikil eftirspurn var eftir jeppanum og árs bið eftir nýjum bíl.

Árið 1970 kostaði Range Roverinn 1.998 pund á sama tíma og Rolls Royce kostaði 10.000 pund. Ef notast er við slíka samanburðarfræði myndi Range Roverinn kosta um 50.000 pund í dag, eða fimmtung af verði Rolls Royce sem kostar nú í kringum 250.000 pund. Nýjasti Range-inn kostar hins vegar frá 71.000 pundi. Árið 1970 var lítill sem enginn lúxus í bílnum. Helsti lúxusinn var teppi á gólfum sem var stórt skref fram á við frá Land Rovernum þar sem gólfin voru máluð. Það gæti skýrt muninn.

Samstarf við tískublaðið Vogue

Árið 1981 kom loks fjögurra dyra útgáfa af jeppanum. Sama ár hóf Land Rover samstarf við tískublaðið Vogue sem var með sérstaka umfjöllun um jeppann. Framleidd var sérstök „In Vogue“ útgáfa. Árið 1988 kom lúxusútgáfan Vogue SE á markað. Upp úr því urðu leðursæti, viðarinnrétting, vökvastýri og önnur þægindi hluti af ímynd Range Rover.

Fjórða kynslóð Range Rover.

Umfjöllunin um Range Rover birtist í Áramótum, tímariti Viðskiptablaðsins sem kom út 28. desember.

Stikkorð: Range Rover  • Áramót 2012