*

Veiði 24. janúar 2013

Leyft að veiða 1.229 hreindýr á árinu

Umhverfisstofnun hefur gefið út heimild til að veiða 202 fleiri hreindýr en í fyrra.

Heimilt verður að veiða allt að 1.229 hreindýr á árinu. Þetta er 220 fleiri dýr en leyft var að veiða í fyrra, samkvæmt nýbirtum kvóta umhverfisráðherra sem birtur var í dag. Kvótinn var gerður að tillögu Umhverfisstofnunar, sem sér um sölu allra veiðiheimilda.

Fram kemur á vef stofnunarinnar að leyft verður að veiða 623 kýr og 606 tarfa. Veiðin skiptist milli níu veiðisvæða og eru mörk þeirra og fjöldi dýra á hverju svæði tilgreind nánar í auglýsingu sem mun birtast í Lögbirtingarblaðinu. Heimildirnar eru veittar með fyrirvara um að ekki verði verulegar breytingar á stofnstærð fram að veiðum sem kalli á endurskoðun veiðiheimilda.

Veiðitíminn er frá 1. ágúst til og með 15. september, en þó getur Umhverfisstofnun heimilað veiðar á törfum frá og með 15. júlí og lengt veiðitíma kúa til og með 20. september. Þá verður sú nýbreytni að heimilt verður að veiða allt að 22 kýr af 68 á veiðisvæði 8 og allar kýr, þ.e. 25, á veiðisvæði 9, á tímabilinu 1. til 30. nóvember. Veturgamlir tarfar eru alfriðaðir og miðast tarfaveiði því við tveggja vetra og eldri tarfa. Óheimilt er að veiða kálfa.