*

Menning & listir 1. desember 2021

Listval opnar sýningarrými í Hörpu

Yfir 200 verk eftir um 70 listamenn verða til sýnis og sölu. Sýningin opnar laugardaginn 4. desember.

Jóhann Óskar Jóhannsson

Starfsemi á jarðhæð Hörpu hefur tekið miklum breytingum síðastliðin misseri. Nýjasta viðbótin er sýningarrými á vegum Listvals sem sérhæfir sig í myndlistarráðgjöf fyrir heimili, fyrirtæki og stofnanir. Laugardaginn 4. desember kl 12:00 opnar fyrsta sýning Listvals í Hörpu, Jólasýning Listvals, þar sem yfir 200 verk verða til sýnis og sölu eftir um 70 listamenn. Sýningin verður opin frá 12-18 á laugardaginn en í framhaldinu verður opnunartími Listvals í Hörpu 10-18 alla daga.

Ætlunin er að skapa rýminu fallega og fágaða umgjörð í formi myndlistarsýninga og gallerís og veita gestum eftirminnilega upplifun og innsýn í það sem íslensk myndlist hefur uppá að bjóða. Við viljum skapa þægilegt andrúmsloft og hughrif fyrir gesti og gangandi. Gestir geta fengið ráðgjöf við val á verkum, fræðst um íslenska myndlist og skoðað bækur um myndlist. Þá ætlum við einnig að vera með viðburðadagskrá með uppákomum þar sem nýjum útgáfum og verkum verður fagnað." segir Elísabet Alma Svendsen stofnandi og annar eigandi Listvals.

Breytingarnar sem gerðar hafa verið á þessu afmælisári Hörpu miða allar að því að starfsemi og þjónusta í húsinu rími vel við kjarnastarfsemina og laði til sín sem fjölbreyttastan hóp gesta. Harpa er fjölsóttasta viðburðahús landsins og það er því mikið tilhlökkunarefni að fá Listval inn með nýja vídd í upplifun og þjónustu við gesti," segir Svanhildur Konráðsdóttir forstjóri Hörpu.

Nánar um Listval

Listval var stofnað árið 2019 með það að markmiði að auðvelda fólki að fjárfesta í myndlist og gera hana aðgengilegri. Listval hefur hjálpað fjölda einstaklinga og fyrirtækja við val á nýjum verkum en einnig aðstoðað einstaklinga með safneign sína og upphengi. Fyrr á þessu ári opnaði Listval sýningarrými á Hólmaslóð 6 þar sem fjölbreytt úrval myndlistar er til sýnis og sölu. Auglýstur opnunartími Listvals á Granda mun haldast hinn sami. 

Elísabet Alma Svendsen og Helga Kjerúlf hafa báðar starfað þvert á svið myndlistar og hönnunar við fjölbreytt verkefni og hafa góða innsýn og mikil tengsl inn í myndlistarsenuna. Þær hafa komið að fjölda verkefna tengdum myndlist og má þar nefna rekstur gallerís, útgáfu, Feneyjartvíæringinn og kynningu á myndlist á alþjóðavísu.

Hægt er að fylgjast með Listval á Instagram og skoða verk á www.listval.is