*

Bílar 21. apríl 2020

Lúxusrafbíll Benz á markað 2022

EQS verður flaggskip rafbílaflota Mercedes-Benz, en hugmyndabíllinn er með 700 km drægni, 700 Nm hámarkstog og 469 hestöfl.

Róbert Róbertsson

Mercedes-Benz EQS verður flaggskip rafbílaflota þýska lúxusbílaframleiðandans þegar hann kemur á markað árið 2022. Bíllinn var frumsýndur í hugmyndaútgáfu á bílasýningunni í Frankfurt í fyrra undir nafninu Vision EQS.

Þessi glæsilegi lúxusrafbíll frá Mercedes-Benz verður fyrsti EQ bíll framleiðandans sem byggir á EVA undirvagninum sem er stækkanlegur og liggur flatur undir bílnum líkt og hjólabretti. EVA undirvagninn gefur því meiri möguleika á auknu innanrými en áður hefur sést að sögn Mercedes-Benz. EQS verður búinn miklum lúxus og tækni fyrir ökumann og farþega og á að vera leiðandi rafbíll í lúxusflokki. 

Mercedes-Benz hefur ekki gefið upp nánari upplýsingar um EQS en margir bíða spenntir eftir komu lúxusrafbílsins á markað. Vision EQS hugmyndabíllinn er með um 700 km drægni samkvæmt WLTP staðli og er búinn tveimur öflugum rafmótorum sem skila 469 hestöflum. Bíllinn er fjórhjóladrifinn og kemst úr kyrrstöðu í hundraðið á aðeins 4,5 sekúndum. Hámarkstogið er 700 Nm. Hægt er að hlaða bílinn allt að 80% hleðslu á innan við 20 mínútum.

Vision EQS er m.a. með nýjustu útgáfuna af MBUX margmiðlunarkerfinu. Bíllinn er búinn nýjasta Level 3 kerfi í sjálfkeyrandi akstri og að sögn Mercedes-Benz verður bíllinn að fullu sjálfkeyrandi í nánustu framtíð. Þá er bíllinn með nýjustu tækni af Digital framljósum sem verða með sérlega öflugt 360° ljósabelti.

AMG útgáfa af EQS kemur á markað fljótlega í kjölfarið en sá verður gríðarlega öflugur með tveimur rafmótorum sem skila alls 600 hestöflum.

Það er margt spennandi framundan hjá Mercedes-Benz í rafbíladeildinni. EQC sportjeppinn er sá fyrsti sem kom á markað í fyrra og hefur fengið góðan orðstír og mikla athygli. Næstu hreinu rafbílarnir sem koma á markað eru EQA, eVito og EQV en Bílaumboðið Askja verður meðal fyrstu umboða í Evrópu sem fá þá bíla til sölu.

Stikkorð: Mercedes Benz  • rafbíll  • EQS