*

Bílar 21. september 2014

Magnús í hópi þeirra sem slógu heimsmet á rafbílum

Yfir 220 rafbílar óku yfir Eyrarsunds- brúnna í dag. Magnús Garðarsson ók á Teslu Model S.

Íslendingurinn Magnús Garðarsson var í hópi á þriðja hundrað ökumanna sem komust í dag í heimsmetabók Guinnes fyrir lengstu samfelldu röð rafbíla sem ekið hefur saman.

Yfir 220 rafbílar óku yfir Eyrarsundsbrúnna, frá Malmö til Kaupmannahafnar í dag og slógu heimsmetið. Það var sett í Japan árið 2010 af ökumönnum 100 rafbíla.

Magnús er framkvæmdastjóri United Silicon sem byggir kísilverksmiðjuna í Helguvík. Hann sagði í samtali við vb.is að það hafi verið skemmtilegt að taka þátt í akstrinum og mikill áhugi var meðal rafbílaeigenda í Danmörku og Svíþjóð.

Dætur Magnúsar, þær Isabella og Alexandra, óku með föður sínum í dag. Magnús keyrir Tesla Model S sem hann pantaði í apríl 2009 og fékk afhentan í október í fyrra. Magnús er hæstánægður með Tesluna, en 45 Teslur tóku þátt í heimsmetsakstrinum í dag.

Segir stjórnvöld ekki gera nóg

Magnús segir að íslensk stjórnvöld ættu að leggja miklu meiri áherslu á að styðja við rafbílavæðingu á Íslandi. ,,Þetta myndi spara þjóðarbúinu milljarða í olíuinnflutning og gera Ísland "sjálfkeyrandi" innan nokkurra ára um leið og bíleigendur fá betra tækifæri í skipta yfir í rafmagnsbíl. Raforkan er ódýr á Íslandi þannig að bíleigendur geta sparað tugi milljarða á ári med því ad skipta yfir í rafbíl. Svo eru rafbílar orðnir betri, flottari, kraftmeiri og rúmbetri en langflestir bensín- og dísilbílar sem til eru í dag,” segir Magnús.

,,Þó svo nokkrar gerðir rafbíla standi fólki til boða á Íslandi í dag er langt í land með  að Íslendingar nái þeim árangri sem lagt var upp með  og nágrannalönd okkar hafa náð. Verðið á rafbílum er hlutfallslega hátt miðað við aðra kosti sem í  boði eru á bílamarkaðnum. Þá þarf að bæta mikið  aðstöðu fyrir rafbíla á Íslandi. Þetta hefur svo sem mjakast eilítið áfram en betur má ef duga skal. Stjórnvöld þurfa að stíga upp og styðja betur við rafbílavæðinguna og sjá til þess að það verði auðveldari kostur fyrir Íslendinga að eignast rafbíla. Það kostar alltaf meira að kaupa nýja tækni og þess vegan þarf að gefa fólki möguleika að taka þátt frá byrjun” segir Magnús ennfremur.