*

Bílar 30. júlí 2020

Meirihluti nýskráðra Honda bíla eru Hybrid

Meirihluti nýskráðra Honda bíla á árinu eru Hybrid, það er knúnir fyrir bæði rafmagni og bensíni.

Meirihluti nýskráðra Honda bíla á árinu eru Hybrid, það er knúnir fyrir bæði rafmagni og bensíni. Honda CRV er söluhæsta gerðin það sem af er ári, en CRV hefur verið einn mest seldi jeppi heims mörg undanfarin ár og var meðal annars valinn jeppi ársins í Bandaríkjunum í fyrra en ný gerð Honda CRV hefur víða slegið í gegn.

Honda CRV var meðal annars jeppi ársins hjá bílatímaritinu WhatCar? sem og valinn græni jeppi ársins hjá Green Car Journal. Nú hafa bæst við tveir nýir Hybrid bílar hjá Honda, annars vegar Honda Jazz og hins vegar Honda Jazz Crosstar sem er snaggaralegur smájepplingur frá japanska bílaframleiðandanum.

Á næstunni verður svo kynntur til sögunnar nýr Honda e sem er bíll sem margir hafa beðið spenntir eftir. Honda e er hreinn rafbíll sem kemst allt að 220 kílómetra á fullhlaðinni rafhlöðu. Um er að ræða nettan og nútímalegan borgarbíl sem er mjög tæknivæddur og snjall bíll. Honda e hefur vakið athygli fyrir flotta og framúrstefnulega hönnun en hann hefur meðal annars fengið Red Dot hönnunarverðlaunin sem eru með þeim eftirsóttustu í bílaheiminum.

Bílaumboðið Askja tók við Honda umboðinu í lok árs 2019 en Honda bílar hafa um árabil verið afar vinsælir á Íslandi. Honda er sjöundi stærsti bílaframleiðandi heims og framleiðir yfir 5 milljón bíla á ári. Fyrirtækið er annar stærsti bílaframleiðandi Japans. Honda hefur markað sér afgerandi stefnu í rafvæðingu og á næstu 36 mánuðum mun Honda kynna sex nýja umhverfisvæna bíla á markað í Evrópu. Þar af verða tveir rafbílar og fjórir Hybrid bílar.