*

Bílar 11. janúar 2016

Mercedes-Benz aldrei selt fleiri bíla á einu ári

Tæplega 2 milljónir Mercedes-Benz bifreiðar seldust á heimsvísu á liðnu ári, sem er sölumet.

Mercedes-Benz setti sölumet á árinu 2015 en þá seldust alls 1.871.511 bifreiðar þýska lúxusbílaframleiðandans á heimsvísu. Aldrei í sögu Mercedes-Benz hefur lúxusbílaframleiðandinn selt fleiri bíla á einu ári. Salan á síðasta ári var 13,4% hærri en árið 2014 sem þá var söluhæsta ár fyrirtækisins.

Þetta var raunar fimmta árið í röð sem Mercedes-Benz sló eigið sölumet. Þá setti Mercedes-Benz auk þess sölumet í desember sl. en þá seldi lúxusbílaframleiðandinn 178.017 bifreiðar og var þetta söluhæsti desember mánuður í sögu fyrirtækisins. Mercedes-Benz fagnaði einnig þeim árangri að ná besta ársfjórðungi í sögu fyrirtækisins frá september til desember en þá seldust alls 495.159 bifreiðar á heimsvísu.

Mercedes Benz var með mikla söluaukningu í Kína en en þar seldi Mercedes-Benz 373.459 bíla og sala þar jókst um heil 33%. Nýr C-Class seldist í alls 443.909 eintökum um heim allan í fyrra. Nýr E-Class er á leiðinni hjá Mercedes-Benz og mun hann vafalaust tryggja Benz mjög mikla sölu á þessu ári líka.

Hér á Íslandi hefur sala Mercedes-Benz einnig aukist og Bílaumboðið Askja, umboðsaðili þýska lúxusbílaframleiðandans, seldi alls 490 nýja Mercedes-Benz bifreiðar á árinu 2015, og þar af voru 330 skráðir Mercedes-Benz fólksbílar. Mercedes-Benz hefur undanfarin ár verið mest selda lúxusbílamerkið á Íslandi.

Stikkorð: Bílar  • Mercedes-Benz