*

Bílar 23. nóvember 2012

Bíll ársins 2013 á Íslandi er Mercedes-Benz A

Hyundai Santa Fe sigraði í flokki jeppa og jepplinga en Lexus GS 450 í flokki vistvænna bíla.

Mercedes-Benz A er Bíll ársins 2013 á Íslandi. Tilkynnt var um þetta við afhendingu Stálstýrisins í sal Blaðamannafélags Íslands í dag.

Það er Bandalag íslenskra bílablaðamanna, BÍBB, sem stendur að valinu. 38 bílar voru tilefndir að þessu sinni í þremur flokkum; fólksbílaflokk, jeppum og jepplingum og vistvænum bílum.

Eftir prófanir stóðu eftir níu bílar sem komust í úrslit. Í fólksbílaflokki voru það Mercedes-Benz A, Volvo V40 og Audi A6. Í jeppa- og jepplingaflokki Hyundai Santa Fe, Range Rover Evoque og Audi Q3. Í flokki vistvænna bíla komust í úrslit Peugeot 508 RXH, Opel Ampera og Lexus GS 450h.

Dómnefnd tók þessa níu bíla til skoðunar með prófunum. Þar var meðal annars tekið mið af hönnun, öryggi, aksturseiginleikum og verði.

Niðurstaða dómnefndar var sú að nýr Mercedes-Benz A væri þess verðugur að teljast bíll ársins á Íslandi. Um er að ræða gerbreyttan og í raun alveg nýja gerð af minnsta fólksbíl Mercedes-Benz. Bíllinn er vel búinn í grunninn og státar af einstaklega fínstilltum aksturseiginleikum. Verð á honum er frá 4,6 milljónum króna.

Sigurvegari í flokki varð jeppa- og jepplinga var ný kynslóð Hyundai Santa Fe. Í flokki vistvænna bíla stóð Lexus GS 450h tvinnbílinn uppi sem sigurvegari.

Val Bandalags íslenskra bílablaðamanna endurspeglar faglegt mat á nýjum bílum sem hafa komið á markað hérlendis síðastliðna tólf mánuði sem skara fram úr á sviði hönnunar, notkunar, rýmis, aksturseiginleika, öryggis og verðs.

Sigurbílarnir

Mercedes Benz A Class er bíll ársins 2013 á Íslandi.

 Lexus GS 450 sigraði í flokki vistvænna bíla.

Hyundai Santa Fe sigraði í flokki jeppa og jepplinga.

Stikkorð: Bíll ársins