*

Bílar 15. janúar 2013

Mercedes Benz sviptir hulunni af nýjum CLA-Class

Nýjasti bílinn frá Mercedes Benz er kynntur á alþjóðlegri tískuviku bílaframleiðandans í Berlín.

Róbert Róbertsson

Mercedes-Benz mun kynna til leiks glænýjan bíl CLA-Class á alþjóðlegri tískuviku Mercedes-Benz sem hefst í Berlín í dag 15. janúar. CLA er fjögurra dyra sportlegur bíll hannaður sem coupé og verður í boði með 4MATIC fjórhjóladrifi ásamt miklum búnaði. 

Hönnunin er sportleg og falleg að innan sem utan. Bíllinn sækir nokkuð svip til CLS-Class og er ekki leiðum að líkjast. Hönnunin á hinum nýja CLA þykir afar vel heppnuð. Kraftmikið grillið að framan lítur út fyrir að vera alsett demöntum. Straumlínulagaðar hliðar bílsins og sportlegur afturhluti hans eru einnig mikið fyrir augað. Mikið er lagt upp úr vönduðu efnisvali í innréttingunni eins og Mercedes-Benz er þekkt fyrir. Bíllinn verður einnig fáanlegur með glæsilegu panomaric glerþaki. CLA verður með lægstu loftmótstöðu sem um getur í bíl eða 0.22 Cd.

Kraftmikill en umhverfismildur

CLA-Class verður boðinn með 1,6 og 2,0 lítra bensínvélum sem skila 122 og 156 hestöflum. Kraftmesta útfærslan CLA 250 verður gríðarlega öflugur með 211 hestafla vél. Þá kemur CLA einnig með tvenns konar díselvélum sem skila miklu afli og togi. Sú minni mun skila 136 hestöflum og togið er 300 NM og sú stærri 170 hestöflum og 350 NM í togi en á sama tíma er CO2 losunin aðeins 109 g/km. Allar vélarnar í nýjum CLA-Class verða með ECO start/stopp búnaði. Hægt verður að fá bílinn með nýrri sex gíra beinskiptingu eða 7G-DCT sjálfskiptingu eins og er í nýjum A-Class.

Nýr CLA-Class er hlaðinn öryggisbúnaði og má þar nefna árekstrarvara (Collision Prevention Assist) en búnaðurinn greinir þegar fjarlægð frá bíl eða kyrrstæðri mótstöðu er of lítil og lætur ökumann vita með mynd- eða hljóðmerki. CLA er væntanlegur á markað í apríl og hingað til lands fyrri hluta sumars samkvæmt upplýsingum frá Öskju, umboðsaðila Mercedes-Benz á Íslandi.