*

Bílar 24. október 2021

Metanbílum frá Scania fjölgar

Um 40 Scania vörubílar og strætisvagnar í nýjustu metanútfærslu eru nú komnir í notkun hér á landi.

Róbert Róbertsson

„Við finnum fyrir auknum áhuga á nýjustu metanbílunum frá fyrirtækjum hér á landi. Sorphirðan í Reykjavík er með fjölda nýrra Scania metanbíla og á Akureyri og í Reykjavík eru nýjustu metan strætisvagnarnir frá Scania. Þó nokkur fyrirtæki hafa verið að fá afhenta metan vöru- og flutningabíla undanfarið," segir Bjarni Arnarson, sölu- og markaðsstjóri Kletts, sem er umboðsaðili fyrir Scania á Íslandi.

Bjarni segir að nýju metanbílarnir séu í svokölluðum 16-40 tonna flokki vöru- og flutningabíla sem er algengastur. „Nýju bílarnir eru að koma með auknu afli samhliða því að spara enn meira eldsneyti en áður. Þeir koma með þremur stærðum af metanvélum sem skila 280, 340 og 410 hestöflum. Tvær þær fyrrnefndu eru 9 lítra en stærsta vélin er 13 lítra. Togið hefur aukist mjög í þessari nýjustu kynslóð metanbílanna og er nú frá 1.350 allt upp í 2.000 Nm sem gerir þessa vinnuþjarka geysilega öfluga," segir Bjarni.

„Scania hefur unnið mjög markvisst í því að draga úr losun koltvísýrings. Við finnum fyrir því að viðskiptavinir eru mikið að spá í umhverfissjónarmið og ekki síður rekstrarlega hagkvæmni. Metan er mjög góður kostur fyrir fyrirtæki sem geta með því valið íslenska framleiðslu sem orkugjafa og minnkað kolefnissporið allt að 80% um leið. Metanbílar eru umhverfismildari en t.d. dísilbílar og þá er einnig stór kostur að þeir eru hljóðlátari þannig að hljóðmengunin er einnig minni af þeim," segir Bjarni. Scania býður einnig upp á rafknúna atvinnubíla sem og tengiltvinnbíla (plug-in hybrid).

Nánar er fjallað um málið í fylgiritinu Atvinnubílar. Áskrifendur geta nálgast blaðið undir Tölublöð, aðrir geta skráð sig í áskrift hér

Stikkorð: Scania  • metan