*

Bílar 25. janúar 2013

Nettur en öflugur sendibíll frá Mercedes-Benz

Citan er ætlað að efla sölu Mercedes-Benz enn frekar í flokki atvinnubíla.

Róbert Róbertsson

Nýr Mercedes-Benz hefur sett á markað sendibílinn Citan sem er nettur en öflugur atvinnubíll og hagkvæmur í rekstri. Citan er ætlað að efla sölu Mercedes-Benz enn frekar í flokki atvinnubíla, en Daimler AG, framleiðandi Mercedes-Benz, er stærsti framleiðandi atvinnubíla í heiminum í dag. Fyrir er þýski lúxusbílaframleiðandinn með breiða línu sendibíla, s.s. Vario, Sprinter og Vito. Sprinter hefur til að mynda verið afar vinsæll og traustur bíll hér á landi, og einn mest seldi bíllinn í sínum flokki um árabil.

Citan er afrakstur samstarfs Mercedes Benz og Renault-Nissan og byggir á sama grunni og Renault Kangoo, sem vel þekktur er hér á landi. Citan verður í boði með eyðslugrönnum dísil- og bensínvélum sem allar hafa frekar lága koltvísýringslosun. Citan verður vel búinn m.a. með Blue EFFICIENCY búnaði eins og nýir lúxusbílar Mercedes-Benz eru búnir en búnaðurinn eykur á sparneytni bíla og minnkar útblástur skaðlegra lofttegunda frá þeim. Citan verður einnig boðinn í ýmsum útgáfum, m.a. sem fjölnotabíll. Hægt verður að panta Citan í mismunandi lengd og hæð sem býður upp á fjölmarga notkunarmöguleika.

Nýr Mercedes-Benz Citan kostar frá 3.590.000 kr. með virðisaukaskatti. Bíllinn verður frumsýndur í Öskju á morgun laugardag kl. 12-16.

Stikkorð: Mercedes-Benz  • Citan