*

Menning & listir 23. september 2020

Ný bók um breytingar í sjávarútvegi

Fræðimenn við Háskólann fá bók útgefna hjá eini stærstu útgáfu heims á vísindagreinum. Bryndís Schram efst á metsölulista.

Í nýrri bók eftir Ástu Dís Óladóttur, dósent við Háskóla Íslands, og Ágúst Einarsson, fyrrverandi rektor Háskólans á Bifröst, prófessor við Háskóla Íslands og alþingismann, er fjallað um þær miklu breytingar sem hafa orðið í sjávarútvegi og hvaða leiðir eru færar í framtíðinni til sjálfbærari og hagkvæmari útgerðar og fiskeldis.

Að neðan má auk þess sjá þær bækur sem eru efstar á metsölulista Eymundsson þessa vikuna, en Brosað gegnum tárin eftir Bryndísi Schram er í fyrsta sæti listans, Lygalíf fullorðinna eftir Elena Ferrante er í öðru sæti og í þriðja sæti er Sundkýrin Sæunn eftir Eyþór Jóvinsson og Freydísi Kristjánsdóttur.

Gefa út fjölda vísindagreina

Bók Ástu Dísar og Ágústs kom út í gær á vegum Academic Press, sem er hluti ELSEVIER-forlagsins, eins stærsta og virtasta útgáfufyrirtækis í heimi. ELSEVIER-forlagið gefur árlega út fjölda bóka og tímarita og starfar í fjölda landa. Í tilkynningu er það sagt leiðandi á heimsvísu í útgáfu vísindagreina og því heiður að bók eftir íslenska höfunda skuli þar gefin út fyrir alþjóðlegan markað.

Bókin nefnist „Fisheries and Aquaculture: The Food Security of the Future“ og byggist á áralöngum rannsóknum Ástu Dísar og Ágústs á umhverfi sjávarútvegs víða um heim. Hún fjallar um sjávarútveg og fiskeldi í alþjóðlegu samhengi í ljósi fæðuöryggis framtíðarinnar.

Í bókinni er þessum atvinnugreinum lýst og þær greindar og sýnt er fram á mikilvægi þeirra í hagkerfi þjóða, meðal annars í þróunarlöndunum. Sýnt er hvernig bæta má árangur fyrirtækja og landa á þessum sviðum, m.a. með tækninýjungum.

Fyrrverandi forseti skrifar inngangsorð bókarinnar

Ólafur Ragnar Grímsson, fyrrverandi forseti Íslands og núverandi formaður Norðurslóða, skrifar inngangsorð að bókinni og dregur þar meðal annars fram hvernig höfundar nýta þekkingu sína á íslenskum sjávarútvegi til að lýsa sjávarútvegi og fiskeldi á heimsvísu á heilsteyptan hátt og vaxandi hlutverki þessara atvinnugreina í fæðuöflun heimsins.

Bókin er ætluð þeim sem starfa í sjávarútvegi, stefnumótendum í greininni, fræðimönnum, háskólanemum og öllum þeim sem áhuga hafa á þróun sjávarútvegs til framtíðar.

Hér má sjá nýjasta metsölulista Eymundsson:

  • 1.sæti    Brosað gegnum tárin    Bryndís Schram
  • 2.sæti    Lygalíf fullorðinna    Elena Ferrante
  • 3.sæti    Sundkýrin Sæunn    Eyþór Jóvinsson / Freydís Kristjánsdóttir
  • 4.sæti    Augu myrkurs    Dean Koontz
  • 5.sæti    Strákurinn í röndóttu náttfötunum    John Boyne
  • 6.sæti    Þegar karlar stranda    Sirrý Arnardóttir
  • 7.sæti    Grafin undir gistihúsi    Ryan Green
  • 8.sæti    Öll með tölu    Kristin Roskifte
  • 9.sæti    Gunnhildur og Glói    Guðrún Helgadóttir
  • 10.sæti    Verstu kennarar í heimi    David Walliams