*

Bílar 10. september 2021

Nýr og breyttur Kia Ceed Sportswagon

Meðaleyðsla bílsins er uppgefin 1,5 l/100 km og kemst bíllinn allt að 57 km á rafmagninu einu.

Róbert Róbertsson

Kia Ceed Sportswagon hefur breyst nokkuð í útliti og sérstaklega að framanverðu þar sem nýr og fallega hannaður framendi blasir við. Nýtt svart grill með nýjum LED framljósum gera framhlutann tignarlegan og nýtt Kia merki nýtur sín vel. Straumlínuleg hönnunin er heilt yfir vel heppnuð og bíllinn fær enn sportlegra og kraftmeira útlit en áður. 16" álfelgur með demantsskurði draga enn frekar fram sportlega ásýnd bílsins.

Innanrýmið hefur einnig fengið upplyftingu sem tekið er eftir. Þar eru áberandi 12,3" stafræni ökumælaklasinn og 10,25" snertiskjár fyrir leiðsögukerfi sem eru samþættir í láréttri stöðu á mælaborðinu og veita ökumanni og farþegum bæði afþreyingu og upplýsingar um aksturinn. Upplýsingum er varpað upp í háskerpu, þar á meðal leiðsögn frá leiðsögukerfinu, upplýsingum frá hljómtækjum, símagögnum og fleiru.

Bíllinn er búinn hinu nýja UVO CONNECT appi sem flytur akstursupplifunina inn í nýja, stafræna vídd. Kia On-Board þjónustan birtir mikilvægar rauntímaupplýsingar hvert sem leiðin liggur en með nýja UVO appinu stýrir ökumaður aðgerðum með stjórnrofum innan seilingar. UVO appið býr yfir fjölda aðgerða sem birta gögn um ástand bílsins og greiningu á akstrinum. Með appinu er einnig hægt að virkja fjölda mikilvægra aðgerða fjarri bílnum með nokkrum smellum á símann.

Kia Ceed Sportswagon í tengiltvinnútfærslu er búinn nýrri aflrás sem samanstendur af 8,9 kW liþíum-pólymer rafgeymastæðu, 44,5 kW rafmótor og sparneytinni, 1,6 lítra bensínvél með beinni innsprautun með sex þrepa gírskiptingu. Losun CO2 er einungis 28 gr/km frá 141 hestafla aflrásinni.

Meðaleyðslan er uppgefin 1,5 l/100 km og kemst bíllinn allt að 57 km á rafmagninu einu samkvæmt WLTP staðal. Verð á nýjum Kia Ceed Sportswagon er frá 4.640.777 kr.

Kia Ceed Sportswagon í tengiltvinnútfærslu verður frumsýndur hjá Bílaumboðinu Öskju á morgun, laugardag klukkan 12-16.