Nýr tengiltvinnjepplingur frá Volvo

Nýr Volvo XC40 Recharge tengiltvinnjepplingur var frumsýndur hjá Brimborg um helgina.

Volvo XC40 er minnsti meðlimurinn í Volvo sportjeppafjölskyldunni og hefur fengið lof fyrir fallega hönnun að utan sem innan síðan hann kom á markað í fjórhjóladrifs dísilútgáfu. Bíllinn var meðal annars valinn bíll ársins í Evrópu 2019. Nú kemur hann í nýrri framdrifinni, rafhlaðinni tengiltvinnútgáfu.

Drægni Volvo XC40 Recharge á rafhlöðunni einni saman er 51-56 km samkvæmt WLTP staðlinum. Meðaleyðsla í blönduðum akstri er 2-2,4 lítrar á hundraðið og CO2 losunin er uppgefin 45-55 g/km. Tengiltvinnvélin skilar bílnum 262 hestöflum í heildina.

Dráttargeta nýja jepplingsins er 1.800 kg. Bíllinn er vel búinn staðalbúnaði og Svíarnir eru með öryggisbúnaðinn á hreinu eins og fyrri daginn. Volvo XC40 Recharge er með góða veghæð eða alls 21,1 cm sem kemur sér vel í íslenskum aðstæðum.

Forsalan á XC40 Recharge hefur gengið mjög vel samkvæmt upplýsingum frá Brimborg en yfir 50 bílar höfðu þegar selst áður en bíllinn var frumsýndur um helgina.