*

Bílar 19. október 2021

Nýtt flaggskip frá MG

MG Motor hefur kynnt nýtt flaggskip í flota sínum, hinn rúmgóða og framúrstefnulega rafknúna jeppling MG Marvel R Electric.

Róbert Róbertsson

MG Marvel R Electric verður til að byrja með fáanlegur í tveimur útfærslum hér á landi; Luxury 2WD sem hefur rúmlega 400 km drægni, og Performance 4WD sem hefur um 370 km drægni. MG Marvel R Electric er búinn fallegri innréttingu og miklum staðalbúnaði fyrir þægindi og öryggi ökumanns og farþega. Bíllinn verður frumsýndur hjá BL laugardaginn 6. nóvember frá kl. 12-16.

MG Marvel R Electric 4WD er búinn þremur rafmótorum; einum að framan og tveimur að aftan. Bíllinn er 288 hestöfl, drægni rafhlöðunnar er um 370 km og snerpan úr kyrrstöðu í 100 km/klst. 4,9 sekúndur enda togið um 665 Nm. MG Marvel R Electric 2WD hefur tvo rafmótora við drifrásina að aftan sem gefa 180 hestöfl og 410 Nm tog. Snerpa úr kyrrstöðu í 100 km/klst. 7,9 sekúndur. Bíllinn hefur um 402 km drægni og hámarkshraði MG Marvel R Electric óháð útfærslum er takmarkaður við 200 km/klst.

Sjálfstæður orkumiðlunarbanki

Í bílnum er 70 kWh rafhlaða sem unnt er að hlaða úr 5% í 80% á aðeins 43 mínútum. Þá er bíllinn einnig búinn svokölluðu vehicle-to-load rafkerfi sem leyfir tengingu við annað og ótengt rafkerfi til að hlaða loftdælu, fartölvu eða rafskutlu svo dæmi sé tekið. Raunar er hægt að hlaða annan rafbíl með orku frá MG Marvel R Electric.

Bíllinn er tæplega 4,7 m langur, rúmir 1,9 m á breidd og 1,7 m á hæð. Hjólhafið er um 2,8 m sem veitir gott rými fyrir bæði farþega og farangur. Farangursrými í skotti er 357 lítrar og alls 1.396 lítrar með niðurfelldum sætisbökum. Í Luxury 2WD er að auki 150 lítra farangurspláss undir hlífinni að framan. Með þakbogum er að auki hægt að setja allt að 50 kg af farangri á topp bílsins auk þess sem dráttargetan er allt að 750 kg s.s. fyrir létta kerru eða tjaldvagn.

Marvel R Electric búinn 19,4 tommu snertiskjá fyrir stjórn afþreyingar og upplýsinga og rúmlega 12 tommu stafrænu mælaborði ásamt fjölbreyttum tengimöguleikum ásamt þráðlausri tengingu við internetið gegnum MG iSMART. Þá er bíllinn einnig með 360° myndavélakerfi.