*

Bílar 10. mars 2015

Öryggið á oddinn hjá Subaru

Eitt það athyglisverðasta við nýjan Outback er öryggismyndavélakerfi sem aðstoðar við að koma í veg fyrir árekstra.

Róbert Róbertsson

Subaru Outback hefur ávallt verið einn af flottustu fulltrúum Subaru og er ný kynslóð bílsins þar engin undantekning. Subaru hefur ávallt lagt mikla áherslu á fjórhjóladrif sem vinnur með lágrétt hönnuðum Boxer vélum.

Nýr Outback, sem frumsýndur var hér á landi um síðustu helgi, er með nýja og uppfærða Boxer dísilvél sem notar einungis 6,0 lítar á hverja 100 km samkvæmt uppgefnum tölum framleiðanda.

Eitt það athyglisverðasta við þessa nýju útgáfu af Subaru er nýtt öryggismyndavélakerfi sem Subaru menn kalla EyeSight. Kerfið sem eitt það fullkomnasta sem völ er á aðstoðar ökumenn við að koma í veg fyrir árekstra. Subaru hefur unnið að þróun kerfisins síðastliðin 20 ár og hefur öryggisbúnaðurinn verið til reynslu í bílum frá Subaru á Japansmarkaði síðastliðin fimm ár.

EyeSight öryggiskerfið tengir saman tvær myndavélar sem staðsettar eru innan við framrúðuna. Myndavélarnar senda litmyndir í þrívídd til tölvu sem kennt hefur verið að bera kennsl á lögun hluta og greina hraða og fjarlægðir með næstum sömu nákvæmni og mannsaugað býr yfir. EyeSight kerfið gerir einnig greinarmun á gangandi vegfarendum, reiðhjólum, mótorhjólum og bílum auk þess að skynja hemlaljós svo eitthvað sé nefnt.

Stikkorð: Subaru Outback