*

Bílar 16. júní 2019

Rafvæðing atvinnubílaflotans framundan

Stjórnendur lítilla og meðalstórra fyrirtækja sjá fram á aukna rafbílavæðingu flotans.

Samkvæmt alþjóðlegri viðhorfskönnun sem m.a. var á vegum Renault-Nissan Group nýverið sjá stjórnendur lítilla og meðalstórra fyrirtækja fram á aukna rafbílavæðingu flotans og innan 20 ára verði hann að fullu rafvæddur og að hluta til einnig sjálfakandi.

Samkvæmt gögnunum gera stjórnendur vaxandi kröfu um aukna sjálfbærni í rekstrinum og er krafan í meiri forgangi eftir því sem bílaflotinn er stærri og fjárhagsleg velta fyrirtækjanna meiri. Að mati stjórnenda sem rætt var við geta bættar og fjölbreyttari nettengingar í bílum skilað betra skipulagi, aukinni hagkvæmni og meiri afköstum í rekstrinum. Um 66% þeirra telja að rafbílar verði eingöngu í rekstrinum innan 20 ára og 50% telja að það muni gerast mun fyrr.

Í könnun samstarfsaðilanna var rætt við mörg þúsund eigendur og stjórnendur lítilla fyrirtækja um allan heim og bendir niðurstaðan til að yfir 90% þeirra sem eru með fimmtíu bíla eða fleiri í rekstrinum leggi mikla áherslu á umhverfislega sjálfbærni. Niðurstaðan helst í hendur við almennt aukna kröfu almennings um allan heim um grænar lausnir í samgöngumálum. Krafan birtist m.a. í stöðugt vaxandi eftirspurn eftir rafvæddum eða alfarið rafknúnum fjölskyldubíl á sama tíma og fyrirtækin sjá fram á hertari útblásturskröfur og meiri svæðisbundnar hömlur á akstur bensín- og dísilbíla.

Aukin eftirspurn

Þessi þróun endurspeglast meðal annars í vaxandi sölu samstarfsaðilanna á umhverfismildari litlum sendibílum (LCV). Til dæmis jók Renault rafknúna litla sendibíla sína um 13,5% á síðasta ári og er Renault með um 46% markaðshlutdeild í þeim flokki í Evrópu. 

Renault gerir ráð fyrir að allir litlir atvinnubílar fyrirtækisins, Kangoo Z.E., Master Z.E., Twizy Cargo og Zoe Societe, verði rafknúnir að einhverju leyti frá og með 2022. Alls seldi Nissan sex þúsund eintök af rafknúna atvinnubílnum e-NV200 á síðasta ári, 50% fleiri en 2017 auk þess sem eftirspurn eftir rafbílnum Leaf hefur aldrei verið meiri frá upphafi um þessar mundir og er fjöldi slíkra bíla í þjónustu fyrirtækja um allan heim.

Nánar er fjallað um málið í fylgiriti Viðskiptablaðsins, Atvinnubílar. Áskrifendur geta nálgast blaðið undir Tölublöð, aðrir geta skráð sig í áskrift hér.