Bílar 23. desember 2013

Ronaldo fékk sér Audi RS6

Leikmenn Real Madrid völdu sér Audi bíla en helmingur leikmanna fékk sér Audi Q7 jeppann.

Þýski lúxusbílaframleiðandinn Audi er aðalstyrktaraðili spænska stórliðsins Real Madrid í knattspyrnu. Með reglulegu millibili fá leikmenn og þjálfarar liðsins nýja bíla að gjöf frá Audi.

Um helmingur allra bílanna sem Audi færði leikmönnum og þjálfurum Real Madrid á dögunum var Audi Q7 jeppinn glæsilegi. Mætti halda að það snjóaði reglulega í nágrenni spænsku höfuðborgarinnar þar sem jeppinn þykir ákaflega góður í snjó og utanvega. Snillingurinn Cristiano Ronaldo valdi frekar sportlegri eiginleika því hann valdi sér Audi RS6 Avant. Ronaldo fer hratt yfir inni á vellinum og vill greinilega gera það sama í akstrinum.

Carlo Ancelotti, hinn ítalski þjálfari Real Madrid, valdi sér dýrasta bílinn, Audi A8 með 4,2 lítra TDI. Varnarmaðurinn sterki, Sergio Ramos, fékk sér Audi RS5. Sérstaka athygli vakti val Jesus Fernandez en hann var auðmýktin uppmáluð og fékk sér sparneytinn Audi A3 Sportback með tveggja lítra dísilvél.