*

Bílar 10. júlí 2019

Samskip fær nýja Actros af 5. kynslóð

Fyrstu bílarnir af þessari Benz gerð voru framleiddir í júní og Samskip því með þeim fyrstu í heiminum til að fá þá afhenta.

Bílaumboðið Askja afhenti nýja Mercedes-Benz Actros 5 atvinnubíla til Samskipa í vikunni. Fleiri Actros bílar munu svo bætast við bílaflota Samskipa á næstu dögum. Fimmta kynslóð Actros var frumsýnd í haust og fyrstu bílar framleiddir nú í júní. Þessir Actros 5 bílar sem Samskip fá eru því með þeim fyrstu í heiminum sem eru komnir í notkun.

Nýr Actros er talsvert frábrugðin forvera sínum hvað útlit varðar, því í stað hefðbundinna baksýnisspegla eru nú komnar myndavélar sem staðalbúnaður. Myndavélarnar eru mikil framför hvað varðar loftmótstöðu, öryggi og alla meðhöndlun bílsins.

Myndavélarnar auka verulega á útsýni fyrir ökumann, auk þess að minnka loftmótsstöðu og draga þannig úr eldsneytisnotkun.  Myndavélakerfið samanstendur af 2 myndavélum sitt hvoru meginn á bílnum, og inni eru tveir 15” skjáir sem festast á gluggapóst hvoru megin.

Nýr Actros hefur að geyma fjölmargar nýjungar frá fyrri gerð, alls um 60 breytingar og margar hverjar eru mikið stökk framávið.  Stór hluti þessara breytinga snýr að því að gera vinnuastöðu ökumanna þægilegri, auka öryggi í umferðinni og minnka eldsneytiseyðslu.

Mælaborðið í Actros 5 samanstendur nú af 2 tölvuskjáum með viðmóti sem svipar mjög til nýjustu snjallsíma, og hægt er að nota hvort sem er Android Auto eða Apple Carplay.   Stýrið kemur úr fólksbílalínu Mercedes-Benz og þaðan er hægt að stýra skjáaðgerðum með mjög einföldum hætti.

Mercedes-Benz með fjórðung af markaðnum

Jón Trausti Ólafsson, framkvæmdastjóri Öskju segir það mikið ánægjuefni að Samskip hafi valið bíla af þessari gerð í sinn rekstur.

„Bílarnir eru vel búnir og munu án efa sinna sínu hlutverki vel. Sala á Mercedes-Benz vörubifreiðum hefur vaxið hér á landi að undanförnu og erum við nú með um fjórðungshlutdeild á þessum markaði, sem staðfestir að notendum líkar bílarnir vel,” segir Jón Trausti.

„Við höfum notað Mercedes-Benz vörubíla í okkar rekstur og þeir hafa reynst hagkvæmir og áreiðanlegir í rekstri, og ákváðum því að endurnýja bílana með nýjum Actros 5 sem bætir vinnuaðstöðu okkar ökumanna, eykur umferðaröryggi og minnkar kolefnisfótspor Samskipa“, segir Birkir Hólm, forstjóri Samskipa.

Stikkorð: Samskip  • Birkir Hólm  • Askja  • Mercedes-Benz  • Jón Trausti Ólafsson  • Acros 5