*

Bílar 9. október 2015

Sjálfakandi Actros flutningabíll

Sjálfakandi atvinnubíll prufaður á hraðbrautum í Þýskalandi.

Mercedes-Benz Actros var á dögunum prófaður á A8 hraðbrautinni milli Denkendorf og Stuttgart í Þýskalandi. Bíllinn er með Highway Pilot sjálfstýringarbúnaði sem gerir það að verkum að bíllinn er sjálfakandi.

Á þessu ári hefur Mercedes-Benz staðið fyrir fjölmörgum prófunum á sjálfakandi atvinnubílum á lokuðum vegum og æfingabrautum. Þessi byltingarkenndi, sjálfvirki búnaður er talinn sýna betra viðbragð og eftirtekt í akstri en venjulegur ökumaður myndi gera. Bíllinn er búinn fjölda myndavéla og nema sem greina umferð og stórt svæði fyrir framan og í kringum bílinn.

Ökumaður getur valið um hvort hann vill aka bílnum sjálfur eða hvort hann vill slappa af og láta bílinn um aksturinn. Sjálfstýringin passar m.a. upp á að halda bílnum á akreininni og í öruggri akstursfjarlægð frá bílnum á undan. Ef fjarlægðin minnkar þá bremsar bíllinn sjálfkrafa með þessum búnaði. Þannig getur ökumaður slakað á og þarf ekki að hafa áhyggjur á meðan sjálfstýringin er í gangi. 

,,Þessi reynsluakstur með hinum nýja Highway Pilot búnaði er enn eitt mikilvægt skrefið í átt að auknum sjálfvirkum akstri atvinnubíla og öruggum, sjálfbærum vegaflutningum framtíðarinnar,” segir Dr Wolfgang Bernhard, stjórnarmaður hjá Daimler AG. Hann sat sjálfur í ökumannsætinu á Actros bílnum í þessum tiltekna reynsluakstri sem heppnaðist mjög vel.