*

Bílar 20. september 2019

Spennandi frumsýningar

Hekla frumsýnir alls fimm nýja bíla á sérstakri Hausthátíð og Brimborg kynnir glænýjan Ford Focus Active á morgun, laugardag.

Hekla frumsýnir fimm nýja bíla þar á meðal þrír nýir tengiltvinnbílar sem ganga fyrir bæði rafmagni og bensíni, sem og metanbíl. Beðið hefur verið eftir tengiltvinnbílnum Volkswagen Passat GTE síðan í byrjun árs og loks er biðin á enda. Nýr og endurbættur Passat GTE sameinar kosti rafmagnsbíla og bíla sem knúnir eru með bensíni. Tengiltvinndrifið fer hljóðlaust í gang á raforkunni einni saman en drægnin hefur aukist um 30% sem hentar þá enn þá betur að aka eingöngu á rafmagni í hefðbundnum akstri Íslendinga. Til viðbótar kynnir Volkswagen nýja útgáfu af stýrikerfi sem er aðgengilegt með WE snjallsímaforritun og nú í fyrsta skiptið möguleiki að fá aðgengi að bílnum og ræsa með snjallsíma í stað hefðbundins lykils.

Audi kynnir nýjasta rafknúna ökutækið; kraftmikinn, sparneytinn og þægilegan Q5 í tengiltvinnútgáfu. Audi Q5 TFSI e er 376 hestöfl, og dregur allt að 40 km á rafmagninu. Hann er með fyrirferðarlítið hleðslukerfi og hlaðinn tæknibúnaði sem veitir aukin þægindi og styður við sparneytinn akstur. Kraftmikið og hrífandi ytra útlit Audi Q5 TFSI e fellur vel inn í fólksjeppahönnun Audi og 18 tommu felgur, sem eru staðalbúnaður, með fimm arma túrbínuútliti styðja við þetta yfirbragð.

Mitsubishi frumsýnir tvo nýja bíla; sportjeppann ASX og hinn geysivinsæla tengiltvinnbíl Outlander PHEV 2020. Í 2020 árgerðinni af Outlander PHEV er stærra og öflugra stafrænt útvarp, nýtt og endurbætt hljóðkerfi en bíllinn býðst áfram á sama grunnverðinu. ASX hefur fengið glæsilega andlitslyftingu í stíl við nýjar og skarpar hönnunarlínur Mitsubishi og hann er einnig aflmeiri en áður. Vélin hefur stækkað úr 1.6 í 2.0 l. vél, hann er nú 150 hö í stað 122 hö og dráttargetan hefur aukist um 100 kg og er nú 1300 kg.

Skoda nýtir tækifærið og frumsýnir formlega metanbílinn Octavia G-Tec með nýju sniði. Metanknúna útgáfan er jafnglæsileg, rúmgóð og snörp og þær bensínknúnu en uppfærður G-Tec er með tvo metantanka sem tryggir lengri drægni á innlendri orku. Octavia G-Tec tryggir fjölskyldum og fyrirtækjum frábæran vistvænan kost.

Nýr Ford Focus Active

Brimborg frumsýnir á morgun glænýjan Ford Focus Active. Þetta er kröftugur og fjölhæfur bíll sem er bæði hagnýtur og sveigjanlegur. Hann blandar saman fjölhæfni jeppa og akstursupplifun í fremstu röð sem Focus er þekktur fyrir. Hann er hátt frá jörðu sem gefur betri yfirsýn og þægilegra aðgengi. Kantar á hliðum gefa bílnum jeppalegra útlit og verja jafnframt hliðar bílsins.

Bíllinn er stútfullur snjöllum lausnum, þar með talið 5 mismunandi akstursstillingar. Þessar stillingar eru Normal, Eco, Sport, Trail og Snow. Þessar stillingar gera það að verkum að bíllinn er góður í akstri við mjög mismunandi aðstæður.  Þær stilla meðal annars af inngjöf, stýrisstillingu sem og gírskiptingu á sjálfskiptum bílum.  Að auki þá breyta þær fjöðrun bílsins og nýta stöðugleikastýrikerfið og spólvörnina til að bíllinn hafi alltaf besta mögulega grip við hinar ýmsu aðstæður.

Hægt er að vera sítengdur við bílinn með FordPass. FordPass hjálpar við að finna staðsetningu bílsins og segir til með stöðu bílsins eins og bensínmagn, olíumagn, birtir viðvaranir og fleira. Það er einnig hægt að opna og læsa bílnum sem og að starta honum með símanum einum.

Stikkorð: Audi  • Volkswagen  • Brimborg  • Hekla  • Mitsubishi  • Skoda  • Frumsýningar