*

Bílar 31. júlí 2013

Suzuki kynnir hugmyndaajeppa

Hinn smágerði jeppi iV-4 frá Suzuki gefur góða hugmynd um hvernig nýr framleiðslujeppi mun líta út.

Hugmyndabíllinn iV-4 frá Suzuki verður frumsýndur á bílasýningunni í Frankfurt í september. Þessi litli jeppi gefur góða hugmynd um hvernig nýr framleiðslujeppi mun líta út sem Suzuki setur á markað í framtíðinni.

Bílasýningin í Frankfurt verður haldin dagana 10. til 22. september í 65. sinn. Auk iV-4 mun Suzuki sýna fjölmarga aðra bíla, þar á meðal nýjan Sx4 S-Cross.

Suzuki iV-4 hugmyndabíllinn er vísbending um hvernig nýr jeppi til viðbótar við margrómaða jeppalínu Suzuki muni líta út.

Bíllinn er hannaður undir kjörorðinu „Grab your field“. Hann býr yfir sterklegum útlitsatriðum jeppa en er um leið persónuleg nálgun Suzuki við sköpun á litlum borgarjeppa. Hann fær ákveðin hönnunaratriði í arf frá öðrum Suzuki jeppum, eins og t.a.m. formhönnun á vélarhlíf og vatnskassahlíf, en heildaryfirbragð bílsins ber með sér nútímaleika og nýjungar.

Stikkorð: Suzuki